Rossiya sudi 27-mart kuni Rossiyaning Ukrainaga bostirib kirishini qoralovchi xabarlarni internetda tarqatgan erkakni olti yillik qamoq jazosiga hukm qildi. Bu haqda The Moscow Times nashri xabar berdi.
35 yoshli Nikolay Farafonov Rossiya shimolidagi Komi respublikasi harbiy sudi tomonidan “terrorchilik harakatlariga ommaviy daʼvat”da aybdor deb topilgan. Sud unga uzil-kesil 6 yillik qamoq jazosi belgilagan.
Manbada aytilishicha, Farafonov harbiy xizmatga chaqiruv bo‘limlariga o‘t qo‘yishni targ‘ib qilgan video va xabarlarni ijtimoiy tarmoqlarda e’lon qilgan. Ijtimoiy tarmoq orqali fuqarolarni uyushtirishga uringan.
Xabarga ko‘ra, Ukrainaga hujum boshlangandan beri Rossiyada harbiy chaqiruv markazlariga o‘t qo‘yishga urinish bilan bog‘liq holat bir necha o‘nlab marta sodir etilgan. Bu voqealar rasmiy hukumatni sergaklantirgan.
Farafonovning tanqidiy xabarlari haqida dastlab “Memorial” nohukumat tashkiloti xabar bergan. Tashkilot uni siyosiy mahbus sifatida tilga olgan.
Farafonov o‘tgan yilning sentyabrida “terrorizmga chaqiriq” aybi bilan hibsga olingani xabar qilingan. Bundan oldin esa u shu maʼnodagi daʼvatlari uchun jarima to‘lagan edi.
Izoh (0)