Sankt-Peterburg sudi 20-mart kuni Kremlning Ukrainadagi harbiy harakatlarini tanqid qilgan kinorejissyorni 3 yillik qamoq jazosiga hukm qildi. Bu haqda The Moscow Times nashri xabar berdi.
Xabarda aytilishicha, 36 yoshli Vsevolod Korolyov 2022-yil iyulidan beri Rossiya qurolli kuchlari haqida atayin yolg‘on maʼlumot tarqatishda gumonlanib, tergov hibsxonasida saqlanib kelayotgan edi. Endilikda sud gumonlanuvchiga nisbatan hukm chiqargan.
Sankt-Peterburgning Viborgskiy tuman sudi Vsevolod Korolyovni 2022-yil bahorida “VKontakte” ijtimoiy tarmog‘ida Bucha va Borodiankada tinch aholining qirg‘in qilinishi, shuningdek, Donetskning o‘qqa tutilishi borasida haqiqatga to‘g‘ri kelmaydigan postlar joylaganlikda aybdor deb topgan.
Sud ayblanuvchiga nisbatan umumiy rejimdagi koloniyada o‘talishi mo‘ljallangan uch yillik qamoq jazosi tayinlagan. Shuningdek, unga 4 yil davomida internetdan foydalanish taqiqlab qo‘yilgan.
Rossiya qonunchiligiga ko‘ra, Ukraina haqidagi rasmiy hukumat manbasidan olinmagan maʼlumotlar “yolg‘on” deb topilishi mumkin va uning tarqatilishi jinoiy javobgarlikka tortishga asos bo‘ladi.
Rossiyaning janubiy Volgograd viloyati sudi ham xuddi shu holat bo‘yicha fuqaroni yolg‘on maʼlumot tarqatganlikda ayblab, besh yilga ozodlikdan mahrum qilish to‘g‘risida hukm chiqargani maʼlum qilingan.
Izoh (0)