Россия суди 27 март куни Россиянинг Украинага бостириб киришини қораловчи хабарларни интернетда тарқатган эркакни олти йиллик қамоқ жазосига ҳукм қилди. Бу ҳақда The Moscow Times нашри хабар берди.
35 ёшли Николай Фарафонов Россия шимолидаги Коми республикаси ҳарбий суди томонидан “террорчилик ҳаракатларига оммавий даъват”да айбдор деб топилган. Суд унга узил-кесил 6 йиллик қамоқ жазоси белгилаган.
Манбада айтилишича, Фарафонов ҳарбий хизматга чақирув бўлимларига ўт қўйишни тарғиб қилган видео ва хабарларни ижтимоий тармоқларда эълон қилган. Ижтимоий тармоқ орқали фуқароларни уюштиришга уринган.
Хабарга кўра, Украинага ҳужум бошлангандан бери Россияда ҳарбий чақирув марказларига ўт қўйишга уриниш билан боғлиқ ҳолат бир неча ўнлаб марта содир этилган. Бу воқеалар расмий ҳукуматни сергаклантирган.
Фарафоновнинг танқидий хабарлари ҳақида дастлаб “Мемориал” ноҳукумат ташкилоти хабар берган. Ташкилот уни сиёсий маҳбус сифатида тилга олган.
Фарафонов ўтган йилнинг сентябрида “терроризмга чақириқ” айби билан ҳибсга олингани хабар қилинган. Бундан олдин эса у шу маънодаги даъватлари учун жарима тўлаган эди.
Изоҳ (0)