O‘zbekistonning yangi tayinlangan elchisi Oybek Shaxavdinov Vengriya prezidenti Tamash Shuyokga ishonch yorliqlarini topshirdi. Bu haqda “Dunyo” agentligi xabar berdi.
Tantanali tadbir Budapeshtdagi Avliyo Georgiy maydonidagi Shandor Palota prezident saroyida bo‘lib o‘tdi. Mehmon sharafiga faxriy qorovul saf tortdi. Shundan so‘ng, prezident qarorgohidagi Mehmonlar kitobiga dastxat yozish va poytaxtning Qahramonlar maydoniga gulchambar qo‘yish marosimi o‘tkazildi.
Marosimdan so‘ng bo‘lib o‘tgan muloqot chog‘ida Vengriya prezidenti Budapesht O‘zbekiston prezidenti Shavkat Mirziyoyev rahnamoligida mamlakatda amalga oshirilayotgan jadal o‘zgarishlar hamda keng ko‘lamli islohotlarni olqishlashini va har tomonlama qo‘llab-quvvatlashini alohida taʼkidladi.
Uchrashuv yakunida prezident Tamash Shuyok O‘zbekiston elchisini yangi lavozimga tayinlangani bilan tabriklab, ikki tomonlama aloqalarni yanada chuqurlashtirish bo‘yicha faoliyatiga muvaffaqiyatlar tiladi.
Oybek Shaxavdinov 7-mart kuni Vengriyaga tashrif buyurdi va u O‘zbekistonning qarorgohi Budapesht shahrida joylashgan birinchi elchisi bo‘ldi.
Diplomat Birmingem universiteti (Buyuk Britaniya), Toshkent davlat yuridik universiteti (magistratura), Moskva davlat xalqaro munosabatlar institutining (MDXMI) tarjimonlar tayyorlash kursini tamomlagan. 2001-yildan buyon TIV tizimida. Mehnat faoliyati davomida TIV markaziy apparatida, Jahon iqtisodiyoti va diplomatiya universitetida hamda mamlakatimizning Bryusseldagi elchixonasida ishlagan. Ushbu lavozimga tayinlanishidan oldin TIVning Yevropa mamlakatlari va Yevropa Ittifoqi institutlari bilan hamkorlik boshqarmasi boshlig‘i lavozimida faoliyat yuritgan.
Izoh (0)