Rossiya parlamentining quyi palatasi yalpi majlisida deputatlar mamlakatda o‘lim jazosiga qo‘yilgan moratoriyni bekor qilish masalasini ko‘tardi. Muhokamalar Crocus City Hall’dagi terakt fonida bo‘lib o‘tdi. Bu haqda Current Times xabar berdi.
Xususan, Rossiya liberal-demokratik partiyasi yetakchisi Leonid Slutskiy moratoriyni bekor qilishni taklif qilgan va uning partiyasi allaqachon tegishli takliflarni tayyorlayotganini aytgan. Kommunistik partiya rahbari Gennadiy Zyuganov Crocus’dagi teraktni sodir etganlarning “yer yuzida yurishga haqqi yo‘q‘ligini aytgan.
“Adolatli Rossiya — Haqiqat uchun” partiyasi lideri Sergey Mironov uning partiyasi terrorchilar va pedofillarga o‘lim jazosini qaytarish bo‘yicha referendum o‘tkazishni talab qilishini aytgan. “Mironov referendumni 2024-yil 8-sentyabr, “Yagona ovoz berish” kunida o‘tkazishni xohlashlarini qo‘shimcha qilgan.
Anneksiya qilingan Qrimdan Davlat dumasining “deputati” Mixail Sheremet ham o‘lim jazosiga qo‘yilgan taqiqning bekor qilinishiga erishish niyatini e’lon qildi. U Rossiya Konstitutsiyaviy sudiga moratoriyni bekor qilishning qonuniy asoslari bo‘yicha so‘rov yuborishini aytdi.
Davlat dumasi raisi Vyacheslav Volodin, o‘z navbatida, o‘lim jazosini qaytarish uchun referendum o‘tkazishning hojati yo‘q – Konstitutsiyaviy sudning qarori yetarli ekanini bildirdi.
“Bugungi kunda Konstitutsiyaviy sudning ushbu normalarni amalga oshirishni keyinga qoldiradigan qarori bor. Biz Yevropa Kengashidan chiqdik. Shuning uchun bu mavzu muhokama talab qiladi”, — deb xulosa qildi Volodin va xavfsizlik sohasidagi qonun hujjatlarini tahlil qilish uchun fraksiyalararo ishchi guruh tuzishni taklif qildi.
Konstitutsiyaviy sud muhokamalarga izoh berishdan bosh tortdi.
Rossiyada o‘lim jazosi qachon bekor qilingan?
Rossiya o‘lim jazosiga moratoriyni 1997-yilda Yevropa Kengashiga qo‘shilganidan so‘ng darhol kiritgan edi. Keyinchalik, Inson huquqlari va asosiy erkinliklarini himoya qilish to‘g‘risidagi Yevropa konvensiyasiga 6-sonli protokol imzolangan: aynan shu hujjat 1997-yil 16-apreldan boshlab Rossiyada o‘lim jazosiga moratoriy kiritgan.
Moratoriy 2010-yilda tugashidan oldin, 2009-yil noyabr oyida Rossiya Konstitutsiyaviy sudi uni yana uzaytirgan. Konstitutsiyaviy sudning bu pozitsiyasi Rossiya 2022-yil oktyabr oyida tashkilotni tark etganida va mamlakatda o‘lim jazosini qo‘llash hech qanday xalqaro shartnoma bilan cheklanmaganiga qaramay, o‘zgarmagan.
Hozirgi kunda rasman 64 ta davlatda o‘lim jazosi qo‘llaniladi. Ular qatorida AQSH, Xitoy, Eron, Saudiya Arabistoni, Iroq, Pokiston, Belarus, Kuvayt, Falastin, Hindiston, Yaponiya va Misr ham bor.
- Crocus City Hall’dagi terakt 22-mart kuni kechqurun sodir bo‘ldi. Bir necha qurollangan kishi konsert zali binosiga bostirib kirib, olomonni otib tashlagan, keyin esa binoni yoqib yuborgan. Terakt oqibatida 139 kishi halok bo‘lgan, 182 kishi jarohatlangan. Hujumni sodir etishda Tojikistonning to‘rt nafar fuqarosi ayblangan, ular aybiga iqror bo‘lgan.
- Mazkur holatdan keyin Rossiyada migrantlarga nisbatan munosabat o‘zgargan. Jumladan, aeroportda qirg‘izistonliklar ushlab turilgani, haydovchilarning millati surishtirilayotgani va ish beruvchilardan migrantlar haqida ma’lumot taqdim etish talab qilinayotgani aytilmoqda. O‘z navbatida, Rossiyaga kirish va chiqishni tekshirish jarayoni kuchaygan. Holat yuzasidan Qirg‘iziston Tashqi ishlar vaziriligi zarurat bo‘lmasa, Rossiyaga tashrif buyurmaslikni tavsiya qilgan.
Izoh (0)