Srechko Katanes: “Raqib haqida biror nima deya olmayman, chunki bor e’tiborim o‘z o‘yinimizni shakllantirishga qaratilgan edi”

Futbol bo‘yicha O‘zbekiston terma jamoasi JCH—2026 saralashi doirasida Gongkongga qarshi bahs olib boradi.

Uchrashuv oldidan O‘zbekiston terma jamoasi bosh murabbiyi Srechko Katanes o‘z fikrlarini bildirib o‘tdi. Eslatib o‘tamiz, sloveniyalik mutaxassis sog‘lig‘idagi muammolar sababli terma jamoaga yordam berolmayapti va o‘z yurtiga jo‘nab ketgan.

“Gongkongga qarshi dastlabki uchrashuvdagi g‘alaba bilan barchani tabriklayman va futbolchilarga minnatdorchilik bildiraman. Raqib haqida biror nima deya olmayman, chunki bor e’tiborim o‘z o‘yinimizni shakllantirishga qaratilgan edi.

Ushbu terma jamoaga qarshi yana bir muhim uchrashuvda maydonga tushamiz. Umid qilamanki, bu safargi bahsda ham dastlabki o‘yindagi kabi ishonchli harakat qilib, g‘alaba qozonamiz”, — deydi Katanes.

O‘zbekiston va Gongkong terma jamoalari o‘rtasidagi bahs 26-mart sanasida “Bunyodkor” stadionida bo‘lib o‘tadi. Uchrashuv 19:30 da start oladi.