O‘zbekiston terma jamoasi yordamchi murabbiyi: “Xavotir yo‘q, lekin bepisandlik bilan yondashishimiz ham mumkinmas”

Futbol bo‘yicha O‘zbekiston terma jamoasi JCH—2026 saralashi doirasida Gongkongga qarshi bahs olib boradi. Uchrashuv 26-mart kuni “Bunyodkor” stadionida bo‘lib o‘tadi.

O‘yin oldidan O‘zbekiston terma jamoasi yordamchi murabbiyi Vlado Radmanovich va futbolchi Azizbek Turg‘unboyev matbuot anjumanida ishtirok etdi.

Biz barchamiz terma jamoaga ishonamiz, butun o‘zbek xalqi ham jamoaga ishonadi. Ertaga kerakli natija uchun qo‘limizdan kelgan barcha ishni amalga oshirishga harakat qilamiz. 

Birinchi o‘yinda yaxshi o‘yin ko‘rsata oldik, umid qilamanki, ertaga ham g‘alaba qozonamiz. 

Biz raqiblarimizni hurmat qilamiz. Xavotir yo‘q, lekin bepisandlik bilan yondashishimiz ham mumkinmas.

Bizda qisqa muddat ichida bir jamoaga qarshi o‘ynash tajribasi bo‘lmagandi. Lekin motivatsiyaga bog‘liq hammasi. Biroq motivatsiya keragidan ortiq bo‘lsa qo‘shimcha bosim ham bo‘lishi mumkin. Meʼyorida kerak bo‘ladi. 

Albatta, biz Katanes bilan doimiy aloqadamiz. Ketishidan oldin ham o‘yinni tashkil etish yuzasidan gaplashib olgandik. Ertaga ham to‘liq aloqada bo‘lib, maslahatlashib turamiz. 

4 ta himoyachi yoki 5 ta himoyachi bilan o‘ynashda qanot futbolchilarining funksiyasi biroz boshqacharoq. Bizning rejaga ko‘ra, Aziz himoyada ham, hujumda ham, yarim himoyada ham faol ishtirok etadi. 

Ertaga bosh murabbiy bilan qanday taktikada o‘ynash haqida gaplashib olamiz.

Vlado Radmanovich, O‘zbekiston terma jamoasi yordamchi murabbiyi

Ertaga ajoyib bahs kutib turibdi. Legionerlar ham tarkibda, to‘liq mashg‘ulotlar olib bormoqdamiz. G‘alaba qozonib, muhim ochkolarni qo‘lga kiritishni maqsad qilganmiz. 

Terma jamoada murabbiy aytgan joyda o‘ynash kerak. Ko‘proq yarim himoyada o‘ynab hujumga qo‘shilishni yoqtiraman. Biroq bu pozitsiyada ham o‘zimni qulay his qilyapman. 

Bolalarda charchoq alomati sezilmayapti. Hammaning holati yaxshi, biz tiklanish mashg‘ulotlarini o‘tkazib ulgurdik. Uchrashuvga tayyormiz.

Azizbek Turg‘unboyev, O‘zbekiston terma jamoasi futbolchisi

Eslatib o‘tamiz, O‘zbekiston va Gongkong o‘rtasidagi uchrashuv 26-mart kuni 19:30 da start oladi.