Di Mariya oilasiga Argentinada o‘ldirish bilan tahdid qilindi.
Bir necha kun oldin, Argentina terma jamoasi bilan birga bo‘lgan Di Mariya o‘z shahrida sodir bo‘layotgan giyohvand moddalar savdosi va boshqa jinoyatlar haqida gapirgan edi.
“U yerda mening ota-onam va opa-singillarim yashaydi, shuning uchun sodir bo‘layotgan voqealar menga juda qattiq ta’sir qiladi. Bu juda hayratlanarli”, — degan edi futbolchi.
Aynan shu suhbatdan so‘ng uning oilasiga tahdid qilingani xabar qilinmoqda.
25-mart sanasida, mahalliy vaqt bilan taxminan tungi 2:30 da Anxel Argentinaga kelganida yashaydigan uyga mashina yetib kelgan. Unda o‘tirganlar shunday xabar qoldirgan: “O‘g‘ling Anxelga ayt, Rosarioga qaytmasin. Agar u quloq solmasa, oilangizdan bir kishini o‘ldiramiz. Hatto Maksimiliano Pugliaro (Rosario joylashgan Santa-Fe provinsiyasi gubernatori) sizni qutqara olmaydi. Biz mayda qog‘oz parchalarini emas, balki o‘liklarni sochamiz”.
Mashina uydan katta tezlikda ketayotganida to‘rtta o‘q ovozi eshitilgan.
Bunday tahdidlar ko‘pincha Rosarioda tarqaladi, ayniqsa Pugliaro "narkoterrorizm" deb ataladigan narsaga qarshi kurashni boshlaganidan keyin bunday harakatlar avjiga chiqdi.
Argentina terma jamoasi bosh murabbiyi Lionel Skaloni Di Mariya bilan nima bo‘lganini muhokama qilganini aytdi. Skaloni fikriga ko‘ra, yarim himoyachi Argentina terma jamoasining Kosta-Rikaga qarshi o‘yinida, bunday mudhish voqeaga qaramay maydonga tushadi.
Eslatib o‘tamiz, 2023-yilda Lionel Messi oilasi Rosarioda ikki marta tahdidlarga uchragan edi. Mart oyida Messining rafiqasining otasi do‘konda otib tashlangan, noyabrda esa amakivachchasining uyi o‘marilgan.
E’tiborlisi, tahdidlar “Benfika” vingeri “Rosario Sentral”ga qaytishi mumkinligi haqidagi ma’lumotlar fonida paydo bo‘lgan. Di Mariyaning “Benfika” bilan shartnomasi 30 iyunga qadar amal qiladi.
Di Mariya faoliyatini “Rosario Central”da boshlagan. U 2001-yildan 2007-yilgacha klub tizimida bo'lgan, keyin esa “Benfika“ga o‘tgan edi.
Izoh (0)