“Real” hujumchisi Karim Benzema 2021-yilning oktabr oyida sud oldida javob beradi.
Fransiyalik futbolchi hozirda “Olimpiakos” safida harakat qilayotgan yarim himoyachi Matyo Valbuenaga nisbatan tovlamachilik qilganlikda gumon qilinmoqda. Sud 20—22-oktabr oralig‘ida bo‘lib o‘tishi rejalashtirilmoqda.
Agar Benzemaning aybi isbotlanadigan bo‘lsa, u holda futbolchini 5 yillik qamoq jazosi va 75 ming yevro miqdoridagi jarima kutib turibdi.
Ma’lumot uchun, 2015-yilda noma’lum shaxslar Valbuenaning ishqiy munosabatlari tasvirlangan videoni tarqatib yuborish bilan qo‘rqitib, undan pul talab qilgani ma’lum bo‘lgandi. Benzema esa jinoyatchilar va Valbuena o‘rtasida vositachi bo‘lgani gumon qilinmoqda.
Eslatib o‘tamiz, mazkur hodisa tufayli har ikki futbolchi Fransiyada o‘tgan Yevro—2016 va Rossiyadagi JCh—2018 musobaqalarini o‘tkazib yuborgandi. “Real” forvardi bir necha yildan buyon yuqori sport formasida bo‘lishiga qaramasdan hamon terma jamoaga chaqirilmayapti.
Yanada ko‘proq futbol va sport yangiliklaridan boxabar bo‘lishni istasangiz, “Daryo”ning Telegram’dagi rasmiy sport kanali — @Daryo_Sport24’ga obuna bo‘ling!
Izoh (0)