Ди Мария оиласига Аргентинада ўлдириш билан таҳдид қилинди.
Бир неча кун олдин, Аргентина терма жамоаси билан бирга бўлган Ди Мария ўз шаҳрида содир бўлаётган гиёҳванд моддалар савдоси ва бошқа жиноятлар ҳақида гапирган эди.
“У ерда менинг ота-онам ва опа-сингилларим яшайди, шунинг учун содир бўлаётган воқеалар менга жуда қаттиқ таъсир қилади. Бу жуда ҳайратланарли”, — деган эди футболчи.
Айнан шу суҳбатдан сўнг унинг оиласига таҳдид қилингани хабар қилинмоқда.
25 март санасида, маҳаллий вақт билан тахминан тунги 2:30 да Анхел Аргентинага келганида яшайдиган уйга машина етиб келган. Унда ўтирганлар шундай хабар қолдирган: “Ўғлинг Анхелга айт, Росариога қайтмасин. Агар у қулоқ солмаса, оилангиздан бир кишини ўлдирамиз. Ҳатто Максимилиано Пуглиаро (Росарио жойлашган Санта-Фе провинцияси губернатори) сизни қутқара олмайди. Биз майда қоғоз парчаларини эмас, балки ўликларни сочамиз”.
Машина уйдан катта тезликда кетаётганида тўртта ўқ овози эшитилган.
Бундай таҳдидлар кўпинча Росариода тарқалади, айниқса Пуглиаро "наркотерроризм" деб аталадиган нарсага қарши курашни бошлаганидан кейин бундай ҳаракатлар авжига чиқди.
Аргентина терма жамоаси бош мураббийи Лионель Скалони Ди Мария билан нима бўлганини муҳокама қилганини айтди. Скалони фикрига кўра, ярим ҳимоячи Аргентина терма жамоасининг Коста-Рикага қарши ўйинида, бундай мудҳиш воқеага қарамай майдонга тушади.
Эслатиб ўтамиз, 2023 йилда Лионель Месси оиласи Росариода икки марта таҳдидларга учраган эди. Март ойида Мессининг рафиқасининг отаси дўконда отиб ташланган, ноябрда эса амакиваччасининг уйи ўмарилган.
Эътиборлиси, таҳдидлар “Бенфика” вингери “Rocariо Central”га қайтиши мумкинлиги ҳақидаги маълумотлар фонида пайдо бўлган. Ди Мариянинг “Бенфика” билан шартномаси 30 июнга қадар амал қилади.
Ди Мария фаолиятини “Rocariо Central”да бошлаган. У 2001 йилдан 2007 йилгача клуб тизимида бўлган, кейин эса “Бенфика“га ўтган эди.
Изоҳ (0)