Surxondaryo viloyatining Qumqo‘rg‘on tumanida 21-mart kuni sel-suv toshqini yuz bergandi. Sel talafotlarini bartaraf etishga viloyat hokimi topshirig‘i bilan barcha tumanlardan yordam chaqirildi.
Viloyat hokimligi matbuot xizmati bergan xabarga ko‘ra, 23-mart kuni sel-suv toshqinlaridan talafot ko‘rgan “Elobod”, “Yangishahar”, “Bog‘aro” va “Azlarsoy” mahallalaridagi 61 ta ko‘cha shahar, tuman hamda korxona va tashkilotlariga biriktirildi. Hududlardan 10 mingga yaqin hasharchi, 200 dan ortiq yuk mashinasi, 100 ga yaqin maxsus transport vositasi, 50 dona motopompa vositalari jalb qilindi.
130 dan ortiq xonadon loyqa suvlardan tozalandi, 12 kilometr ichki yo‘llar toshlandi, 3 mingdan ortiq obyekt hamda 2,5 mingga yaqin suv hovuzlari dezinfeksiyalandi. Aholi qaromog‘idagi 100 dan ortiq chorva mollari xavfsiz hududlarga o‘tkazilib, veterinariya xizmati ko‘rsatildi. Tozalangan va tartibga keltirilgan ko‘chalar bo‘ylab, mingdan ortiq, mavsumga mos daraxt va buta ko‘chatlari o‘tqazildi.
Qayd etilishicha, kelgusida sel-suv toshqinlarining oldini olish, yopilib qolgan sel yo‘llarini ochish, yangilarini tashkil etish, to‘rtta mahallada ham ishlarni tizimli, bosqichma-bosqich sifatli amalga amalga oshirgan holda, aholini yashash manzillariga qaytarish, ularga zarur sharoitlarni yaratish bo‘yicha chora-tadbirlar belgilab olindi.
Ayni vaqtda Favqulodda vaziyatlar, Ichki ishlar, Milliy gvardiya boshqarmalari boshliqlari, shahar va tumanlar hokimlari rahbarligida biriktirilgan ko‘chalar bo‘ylab, tozalash-ta’mirlash, obodonlashtirish, ko‘chalarni tartibga keltirish va daraxt ko‘chatlari ekish ishlari davom etmoqda.
Izoh (0)