Сурхондарё вилоятининг Қумқўрғон туманида 21 март куни сел-сув тошқини юз берганди. Сел талафотларини бартараф этишга вилоят ҳокими топшириғи билан барча туманлардан ёрдам чақирилди.
Вилоят ҳокимлиги матбуот хизмати берган хабарга кўра, 23 март куни сел-сув тошқинларидан талафот кўрган “Элобод”, “Янгишаҳар”, “Боғаро” ва “Азларсой” маҳаллаларидаги 61 та кўча шаҳар, туман ҳамда корхона ва ташкилотларига бириктирилди. Ҳудудлардан 10 мингга яқин ҳашарчи, 200 дан ортиқ юк машинаси, 100 га яқин махсус транспорт воситаси, 50 дона мотопомпа воситалари жалб қилинди.
130 дан ортиқ хонадон лойқа сувлардан тозаланди, 12 километр ички йўллар тошланди, 3 мингдан ортиқ объект ҳамда 2,5 мингга яқин сув ҳовузлари дезинфекцияланди. Аҳоли қаромоғидаги 100 дан ортиқ чорва моллари хавфсиз ҳудудларга ўтказилиб, ветеринария хизмати кўрсатилди. Тозаланган ва тартибга келтирилган кўчалар бўйлаб, мингдан ортиқ, мавсумга мос дарахт ва бута кўчатлари ўтқазилди.
Қайд этилишича, келгусида сел-сув тошқинларининг олдини олиш, ёпилиб қолган сел йўлларини очиш, янгиларини ташкил этиш, тўртта маҳаллада ҳам ишларни тизимли, босқичма-босқич сифатли амалга амалга оширган ҳолда, аҳолини яшаш манзилларига қайтариш, уларга зарур шароитларни яратиш бўйича чора-тадбирлар белгилаб олинди.
Айни вақтда Фавқулодда вазиятлар, Ички ишлар, Миллий гвардия бошқармалари бошлиқлари, шаҳар ва туманлар ҳокимлари раҳбарлигида бириктирилган кўчалар бўйлаб, тозалаш-таъмирлаш, ободонлаштириш, кўчаларни тартибга келтириш ва дарахт кўчатлари экиш ишлари давом этмоқда.
Изоҳ (0)