Qashqadaryo viloyatida 2024-yilning uch oyida 185 ta bog‘cha foydalanishga topshirildi. Bu haqda “Daryo”ga viloyat hokimligi xabar berdi.
Ma’lum qilinishicha, ana shunday bog‘chalarning bir yuz sakson beshinchisi 23-mart kuni Qarshi tumanining “Chaman” mahallasida foydalanishga topshirilgan.
Tantanali ochilish marosimida viloyat hokimi Murodjon Azimov va keng jamoatchilik vakillari ishtirok etdi. Mazkur bog‘chada bolajonlar uchun barcha sharoitlar yaratilgan bo‘lib, qo‘shimcha ravishda xorijiy tillar to‘garaklari, futbol, karate, mental arifmetika, xoreografiya va rasm hamda mohir qo‘llar, boks va badiiy gimnastika bo‘yicha ham to‘garaklar tashkil etilgan, — deydi Qarshi tumani hokimligi axborot xizmati rahbari To‘lqin Turdiyev.
Bildirilishicha, mazkur bog‘chada pedagoglar kasting asosida tanlab olingan.
Tadbirkor Samandar Narzullayevning aytishicha, kam ta’minlangan, ijtimoiy himoyaga muhtoj oilalarning farzandlari ham ushbu bog‘chada imtiyozli tahsil olishlari yo‘lga qo‘yilgan, — deydi mas’ul.
Viloyat hokimligi axborot xizmati rahbari Ahror Sodiqovning “Daryo”ga qo‘shimcha qilishicha, 2024-yilning uch oyi davomida viloyatda 185 ta maktabgacha ta’lim muassasai ochilib, 9438 nafar bola qamrab olingan. Viloyatda qamrov darajasi 2023-yil yakunidagi 60,2 foizdan 63 foizga yetgan.
Qarshi tumani hokimi Zoir Aliqulovning “Daryo” jurnalistiga bildirishicha, tumanda shuningdek, sifatli va zamonaviy tibbiyot maskanlaridan yana biri foydalanishga topshirilgan.
Muhtaram Prezidentimiz 2023-yil 24—25-oktyabr kunlari vohamizga tashriflari davomida viloyatda sog‘liqni saqlash tizimi salohiyatini oshirish zarurligini ta’kidlagan edilar. Shunga muvofiq tarzda viloyatning chekka hududlarida ham aholi o‘rtasida sog‘lom turmush tarzini targ‘ib etish hamda sog‘liqni saqlash tizimi salohiyatini oshirish maqsadida yana bir hududda sifatli va zamonaviy tibbiyot aholiga yaqinlashtirildi. Yurtimizda Navro‘z shukuhi kezib yurgan shu kunlarda tumanimizning “Guliston” mahallasida yangi, zamon talabiga javob beradigan Guliston oilaviy shifokorlik punktini foydalanishga topshirdik. Yangi obyektning foydalanishga topshirilishi munosabati bilan tashkil etilgan tadbirda viloyatimiz rahbari Murodjon Azimov ham ishtirok etib, tumandoshlarimiz uchun tayyorlangan binoni ochib berdi, — deydi tuman hokimi.
Qo‘shimcha qilinishicha, “Guliston” mahallasi tuman markazidan 30 kilometr, eng yaqin Ko‘chkak oilaviy shifokorlik punktidan 20 kilomter uzoqlikda joylashgan. Ushbu muassasa yangi zamonaviy UTT va EKG apparatlari bilan ta’minlangan. Qurilish ishlariga 2 milliard 836 million so‘m mablag‘ sarflangan.
Izoh (0)