Қашқадарё вилоятида 2024 йилнинг уч ойида 185 та боғча фойдаланишга топширилди. Бу ҳақда “Дарё”га вилоят ҳокимлиги хабар берди.
Маълум қилинишича, ана шундай боғчаларнинг бир юз саксон бешинчиси 23 март куни Қарши туманининг “Чаман” маҳалласида фойдаланишга топширилган.
Тантанали очилиш маросимида вилоят ҳокими Муроджон Азимов ва кенг жамоатчилик вакиллари иштирок этди. Мазкур боғчада болажонлар учун барча шароитлар яратилган бўлиб, қўшимча равишда хорижий тиллар тўгараклари, футбол, каратэ, ментал арифметика, хореография ва расм ҳамда моҳир қўллар, бокс ва бадиий гимнастика бўйича ҳам тўгараклар ташкил этилган, — дейди Қарши тумани ҳокимлиги ахборот хизмати раҳбари Тўлқин Турдиев.
Билдирилишича, мазкур боғчада педагоглар кастинг асосида танлаб олинган.
Тадбиркор Самандар Нарзуллаевнинг айтишича, кам таъминланган, ижтимоий ҳимояга муҳтож оилаларнинг фарзандлари ҳам ушбу боғчада имтиёзли таҳсил олишлари йўлга қўйилган, — дейди масъул.
Вилоят ҳокимлиги ахборот хизмати раҳбари Аҳрор Содиқовнинг “Дарё”га қўшимча қилишича, 2024 йилнинг уч ойи давомида вилоятда 185 та мактабгача таълим муассасаи очилиб, 9438 нафар бола қамраб олинган. Вилоятда қамров даражаси 2023 йил якунидаги 60,2 фоиздан 63 фоизга етган.
Қарши тумани ҳокими Зоир Алиқуловнинг “Дарё” журналистига билдиришича, туманда шунингдек, сифатли ва замонавий тиббиёт масканларидан яна бири фойдаланишга топширилган.
Муҳтарам Президентимиз 2023 йил 24—25 октябрь кунлари воҳамизга ташрифлари давомида вилоятда соғлиқни сақлаш тизими салоҳиятини ошириш зарурлигини таъкидлаган эдилар. Шунга мувофиқ тарзда вилоятнинг чекка ҳудудларида ҳам аҳоли ўртасида соғлом турмуш тарзини тарғиб этиш ҳамда соғлиқни сақлаш тизими салоҳиятини ошириш мақсадида яна бир ҳудудда сифатли ва замонавий тиббиёт аҳолига яқинлаштирилди. Юртимизда Наврўз шукуҳи кезиб юрган шу кунларда туманимизнинг “Гулистон” маҳалласида янги, замон талабига жавоб берадиган Гулистон оилавий шифокорлик пунктини фойдаланишга топширдик. Янги объектнинг фойдаланишга топширилиши муносабати билан ташкил этилган тадбирда вилоятимиз раҳбари Муроджон Азимов ҳам иштирок этиб, тумандошларимиз учун тайёрланган бинони очиб берди, — дейди туман ҳокими.
Қўшимча қилинишича, “Гулистон” маҳалласи туман марказидан 30 километр, энг яқин Кўчкак оилавий шифокорлик пунктидан 20 киломтер узоқликда жойлашган. Ушбу муассаса янги замонавий УТТ ва ЭКГ аппаратлари билан таъминланган. Қурилиш ишларига 2 миллиард 836 миллион сўм маблағ сарфланган.
Изоҳ (0)