Dehqonoboddagi DXX chegara qo‘shinlariga qarashli harbiy qismda yangi bog‘cha ish boshladi

Dehqonobod tumanining qo‘shni Turkmaniston bilan chegaradosh hududida joylashgan harbiy qismda qisqa muddatli maktabgacha ta’lim tashkiloti ish boshladi. Bu haqda “Daryo”ga tuman hokimligi axborot xizmati xabar berdi. 

 

 

Ta’kidlanishicha, mazkur tashabbus hukumatning “O‘zbekiston Respublikasi Davlat xavfsizlik xizmati Chegara qo‘shinlarida davlat maktabgacha ta’lim tashkiloti faoliyatini yo‘lga qo‘yish to‘g‘risida”gi qarori asosida ilgari surilgan bo‘lib, joylardagi harbiy shaharchalarda xuddi shunday qisqa muddatli maktabgacha ta’lim tashkilotlari faoliyat boshlamoqda. 

 

 

Mazkur qaror ijrosi yuzasidan Dehqonobod tumanining qo‘shni Turkmaniston davlati bilan chegaradosh bo‘lgan “Torqopchug‘ay” mahallasining Bo‘ztepa qishlog‘ida joylashgan harbiy qismda ham qisqa muddatli zamonaviy tipda jihozlangan maktabgacha ta’lim tashkiloti ish boshladi. Bugun tuman hokimi Zoir Aliqulov, tuman prokurori Otabek Usanov, tuman IIB boshlig‘i G‘ayrat Haydarov hamda tegishli tashkilot rahbarlari ishtirok etgan tadbirda bog‘chaning rasmiy ochilish marosimi o‘tkazildi, — deydi hokimlik axborot xizmati xodimi. 

 

 

Ta’kidlanishicha, bog‘cha ochilishida harbiy xizmatchilarning farzandlariga tuman hokimi tomonidan sovg‘alar ulashilgan.

Harbiy xizmatchilarning farzandlarini ijtimoiy himoya qilish, turmush o‘rtoqlarining bandlik masalalarini hal qilishda ushbu yangi muassasaning barpo qilinishi ayni muddao bo‘ldi. Sababi, maktabgacha ta’lim tashkiloti faoliyati yo‘lga qo‘yilishi natijasida chegarani qo‘riqlash postidagi harbiy xizmatchilarning farzandlari tarbiyalanishi barobarida ularning turmush o‘rtoqlari ham ish bilan ta’minlandi, — deydi tuman hokimi Zoir Aliqulov. 

 

 

Qo‘shimcha qilinishicha, DXX Chegara qo‘shinlari xizmat faoliyatining o‘ziga xosligi, bo‘linmalarning aholi punktlaridan uzoqligi va yopiq harbiy shaharchalarda joylashganini inobatga olib, Dehqonobod tumanida joylashgan chegarani qo‘riqlash vzvodida harbiy xizmatchilarning farzandlari tarbiyalanadigan yangi maktabgacha ta’lim tashkilotida bolajonlar uchun barcha qulayliklar yaratilgan.

 

 

Keng, shinam xonalar bolalarbop mebel jihozlari, rang-barang o‘yinchoqlar va ko‘rgazmali qurollar bilan ta’minlangan. Hovlida esa bolajonlar uchun yozgi o‘yin maydoni ham barpo etilgan.