Mehmonlar bilan gavjum bog‘lar, gullar bilan bezangan qizlar va saf tortgan to‘ybolalar — Namanganda Navro‘z

Namanganda Navro‘z ayyomi ko‘tarinki kayfiyat bilan qarshi olindi. Bu haqda “Daryo” muxbiri Azizbek Abduvaliyev xabar bermoqda.

Viloyat markazi — Namangan shahridagi bayram tantanalari Zahiriddin Muhammad Bobur nomli bog‘ va “Afsonalar vodiysi” parkida nishonlandi.

Bu ikki manzil viloyatning turli hududlaridan kelgaan minglab namanganliklar va mehmonlar bilan gavjum bo‘ldi.

Tadbirlar davomida milliy o‘yinlar va udumlar, sport musobaqalariga keng o‘rin berildi. Yigitlar arqon tortish, varrak uchirish, tosh ko‘tarish va kurashda bellashgan bo‘lsa, qizlar bahor gullaridan chambarak tayyorlash, do‘ppido‘zlik, o‘sma qo‘yish va jozibali raqslarni maromiga yetkazdi.

Ayyom kuni o‘nlab qozonda sumalak qaynadi, palovlar bayramona bezatildi. Ushbu taomlar maxsus idishlarga solinib, mahallalarga va talabalar turar joylariga yetkazildi.

Bayramda turli millat vakillari ham faol qatnashdi. Viloyatdagi milliy madaniyat markazlari vakillarining chiqishlari barchaga manzur bo‘ldi.

Bayram bahona bolakaylarning xatna to‘ylari o‘tkazildi. Ular shahzodalardek kiyintirilib, sovg‘a-salom, to‘yonalar berildi.

Namangandagi bayram tadbirlarida taniqli sanʼatkorlar, yosh ijrochilar, folklor guruhlari, badiiy havaskorlik jamoalari isteʼdodlarini namoyish etdi. Xalqona kuy-qo‘shiqlar, o‘lan-laparlar jarangladi.

Viloyat hokimi Shavkat Abdurazzoqov boshchiligidagi mutasaddilari bayram tadbirlarida ishtirok etib, ularning qatnashchilari bilan muloqotda bo‘ldi.

Namanganda Navro‘z bayramiga bag‘ishlangan sayllar va tadbirlar davom etmoqda.