Makroiqtisodiy va hududiy tadqiqotlar instituti (MHTI) ekspertlari 2017-2023-yillar oralig‘ida O‘zbekistonda yo‘lovchilarni tashish sohasida ro‘y bergan o‘zgarishlarni tahlil qildi.
Tahlil 2017-2023-yillar oralig‘ida mamlakatimizda yo‘lovchilarni tashish va yo‘lovchi aylanmasida sezilarli o‘sish bo‘lganligini ko‘rsatdi. Xususan, 2017-yilda barcha transport vositalari orqali 5 679,0 mln kishi o‘z manziliga yetkazilgan bo‘lsa, 2023-yilda bu ko‘rsatkich salkam 6 452,0 mln kishini tashkil etdi. Yo‘lovchi aylanmasi esa 130,0 mlrd yo‘lovchi/km dan 152,7 mlrd yo‘lovchi/km ga oshgan.
2023-yilda yo‘lovchi tashishda avtomobil transportining ulushi 97,2% ni tashkil qilgan. Agar 2017-yilda 5 591,3 mln kishi manzilga yetkazilgan bo‘lsa, 2023-yilda ularning soni 6 270,2 mln kishini tashkil qilgan. Avtomobil transportida yo‘lovchi aylanmasi mos ravishda ortib, 117,7 mlrd yo‘lovchi/km dan 133,8 mlrd yo‘lovchi/km ga yetgan.
2017-2023-yillarda metropolitendan foydalangan yo‘lovchilar soni 2,6 marotaba oshgan va 61,6 mln kishidan 162,7 mln kishiga yetgan. Mutanosib ravishda yo‘lovchi aylanmasi ham 459,1 mln yo‘lovchi/km dan 1 186,4 mln yo‘lovchi/km ga ko‘paygan.
Havo transporti vositasida tashilgan yo‘lovchilar ham mazkur davr mobaynida 2,4 barobar oshgan va 2,2 mln kishidan 5,3 mln kishiga yetgan. Yo‘lovchi aylanmasi 7,5 mlrd yo‘lovchi/km dan 13,8 mlrd yo‘lovchi/km ga ortgan.
Izoh (0)