Farg‘onada 100 dan ortiq OTM rahbarlari ishtirokida “Rektorlar bog‘i” tashkil etildi

Farg‘onadagi Politexnika instituti hududida mamlakatda ilk “Rektorlar bog‘i” tashkil etildi. Bu haqda “Daryo” muxbiri Azizbek Abduvaliyev xabar bermoqda.

Mamlakatdagi 100 dan ortiq davlat, nodavlat va xorijiy oliy taʼlim muassasalari rektorlari Farg‘onada jamlandi. Bu yerda dastlab Farg‘ona davlat universitetining 1200 o‘rinli Pedagogika va psixologiya fakultetining ochilish marosimi bo‘lib o‘tdi.

Mehmonlar 7 qavatli ushbu fakultetda talabalar uchun yaratilgan sharoitlar — zamonaviy auditoriyalar, anjumanlar zali, o‘quv va trening xonalari, maʼnaviyat va maʼrifat, media, axborot-resurs markazlari bilan yaqindan tanishdi.

Jahon standartlariga mos ravishda qurilgan, zamonaviy texnologiyalar bilan jihozlangan mazkur o‘quv binosi dizayniga innovatsion yondashilgani ishtirokchilar eʼtirofiga sazovor bo‘ldi.

Binoda millat qahramonlari, adabiyot namoyondalari, jadidchilik harakati yetakchilari siymolari ham to‘laqonli aks etgan.

Maʼnaviyat va maʼrifat markazida Oliy taʼlim, fan va innovatsiyalar vaziri Qo‘ng‘irotboy Sharipov va viloyat hokimi Xayrullo Bozorov ishtirokida oliy taʼlim muassasalari rektorlarining kengaytirilgan hayʼat yig‘ilishi bo‘lib o‘tdi.

Viloyat hokimi o‘z so‘zida YUNESKOning taʼlimni targ‘ib qiluvchi shaharlar ro‘yxatiga dunyodagi 160 ga yaqin shaharlar qatorida Farg‘ona shahri ham kiritilganligini taʼkidladi. Viloyat “Ahmad al-Farg‘oniy izdoshlari” mavzusidagi xalqaro ilmiy-amaliy anjumanni o‘tkazishga tayyor ekanligini bildirdi.

Farg‘ona davlat universiteti rektori Bahodir Shermuhammadov tomonidan “Talaba-yoshlarni vatanparvarlik ruhida tarbiyalash tizimi” mavzusida taqdimot o‘tkazildi. Taqdimotda talaba-yoshlarni vatanparvarlik ruhida tarbiyalash tizimining asosiy vazifalari, ularni amalga oshirish mexanizmi ilgari surildi.

Shundan so‘ng mehmonlar Farg‘ona Politexnika institutida bo‘lib, bu yerda talabalar mustaqil taʼlim olishi uchun yaratilgan sharoitlar, taʼlimning kredit tizimini boshqarish sektori — student ofis faoliyati bilan tanishdi. “O‘zbekistonda ilg‘or muhandislik maktablari: konsepsiya va istiqbollar” mavzusidagi seminarda ishtirok etdi.

Yakunda Farg‘onadagi tadbirlarga tashrif buyurgan rektorlar ishtirokida “Yashil makon” ummumilliy loyihasi doirasida institut hududiga manzarali daraxt ko‘chatlari ekildi.