Фарғонада 100 дан ортиқ ОТМ раҳбарлари иштирокида “Ректорлар боғи” ташкил этилди

Фарғонадаги Политехника институти ҳудудида мамлакатда илк “Ректорлар боғи” ташкил этилди. Бу ҳақда “Дарё” мухбири Азизбек Абдувалиев хабар бермоқда.

Мамлакатдаги 100 дан ортиқ давлат, нодавлат ва хорижий олий таълим муассасалари ректорлари Фарғонада жамланди. Бу ерда дастлаб Фарғона давлат университетининг 1200 ўринли Педагогика ва психология факультетининг очилиш маросими бўлиб ўтди.

Меҳмонлар 7 қаватли ушбу факультетда талабалар учун яратилган шароитлар — замонавий аудиториялар, анжуманлар зали, ўқув ва тренинг хоналари, маънавият ва маърифат, медиа, ахборот-ресурс марказлари билан яқиндан танишди.

Жаҳон стандартларига мос равишда қурилган, замонавий технологиялар билан жиҳозланган мазкур ўқув биноси дизайнига инновацион ёндашилгани иштирокчилар эътирофига сазовор бўлди.

Бинода миллат қаҳрамонлари, адабиёт намоёндалари, жадидчилик ҳаракати етакчилари сиймолари ҳам тўлақонли акс этган.

Маънавият ва маърифат марказида Олий таълим, фан ва инновациялар вазири Қўнғиротбой Шарипов ва вилоят ҳокими Хайрулло Бозоров иштирокида олий таълим муассасалари ректорларининг кенгайтирилган ҳайъат йиғилиши бўлиб ўтди.

Вилоят ҳокими ўз сўзида ЮНЕСКО нинг таълимни тарғиб қилувчи шаҳарлар рўйхатига дунёдаги 160 га яқин шаҳарлар қаторида Фарғона шаҳри ҳам киритилганлигини таъкидлади. Вилоят “Аҳмад ал-Фарғоний издошлари” мавзусидаги халқаро илмий-амалий анжуманни ўтказишга тайёр эканлигини билдирди.

Фарғона давлат университети ректори Баҳодир Шермуҳаммадов томонидан “Талаба-ёшларни ватанпарварлик руҳида тарбиялаш тизими” мавзусида тақдимот ўтказилди. Тақдимотда талаба-ёшларни ватанпарварлик руҳида тарбиялаш тизимининг асосий вазифалари, уларни амалга ошириш механизми илгари сурилди.

Шундан сўнг меҳмонлар Фарғона Политехника институтида бўлиб, бу ерда талабалар мустақил таълим олиши учун яратилган шароитлар, таълимнинг кредит тизимини бошқариш сектори — студент офис фаолияти билан танишди. “Ўзбекистонда илғор муҳандислик мактаблари: концепция ва истиқболлар” мавзусидаги семинарда иштирок этди.

Якунда Фарғонадаги тадбирларга ташриф буюрган ректорлар иштирокида “Яшил макон” уммумиллий лойиҳаси доирасида институт ҳудудига манзарали дарахт кўчатлари экилди.