Qashqadaryo viloyatining Dehqonobod tumanida yashovchi fuqarolar Xalq deputatlari viloyat kengashidagi O‘zLiDeP deputatlik guruhiga murojaat qilib, tuman hududidagi yo‘llar yaroqsiz holga kelib qolganini, bu haydovchilar va yo‘lovchilarga noqulaylik tug‘dirayotganini aytib, shikoyat qilgan. Shundan so‘ng deputatlik guruhi a’zolari, partiya faollari bilan birgalikda tumanda bo‘lib yo‘llar holatini ko‘zdan kechirdi.
Bizga viloyat avtomobil yo‘llari Bosh boshqarmasi bosh mutaxassisi Oybek Elboyev, Qashqadaryo yo‘llardan muntazam foydalanish davlat muassasasi boshlig‘i Najmiddin Azimov, mazkur muassasa harakat xavfsizligini ta’minlash bosh mutaxassisi Ilyos Yusupovlar hamrohlik qildi. Birinchi manzilimiz tumandagi Gumbuloq qishlog‘i bo‘ldi. M-39 Toshkent—Termiz yo‘lining mazkur qishloq hududidan o‘tgan 2 kilometr qismi nihoyatda ta’mirtalab. Bu yerda boshlangan yo‘l qurilish ishlari poyoniga yetkazilmagani bois, yo‘lning bir tomoni baland ikkinchi tarafi esa past bo‘lib qolgan, — deydi deputatlik guruhi vakillari.
Bildirilishicha, mazkur yo‘lning tumandagi “Novobod” mahallasi hududidan o‘tgan 1265—1297 kilometr qismi ham yaroqsiz holga kelgan.
Hartugul ishchi guruhining tashrifi samarasiz bo‘lgani yo‘q. Yo‘lsozlar bizning borishimizdan xabar topishgach, yo‘llardagi chuqurlarga shag‘al to‘ldirib, “yamash”ga kirishdi. Ammo bu yamoqlar bir- ikki kunga dosh berishini ularning o‘zlari ham yaxshi biladi, — deydi mas’ullar.
Yo‘lsozlarning mas’ullarga bildirishicha, M-39 Olmaota—Bishkek—Toshkent—Termiz avtomobil yo‘lining 3 kilometri 2006—2022-yillarda ta’mirlanib, foydalanishga topshirilgan.
147 kilometr yo‘lning 18 kilometri sementobeton qoplamali, 80 kilometri asfalt beton qorishmali va 49 kilometri qora qorishmali qoplamani tashkil etgan. 2014-yilda mazkur avtomobil yo‘lining 1265—1290, 1297—1315 kilometr qismlaridagi yo‘l qurilish ishlari “Bekobod yo‘l sanoat” korxonasi va Angren burg‘ulash portlatish ishlari maxsus boshqarmasiga yuklatilgan. Ular ikki yil mobaynida yo‘lni ta’mirlash bilan shug‘ullanishgan. Taxminan 2016-yilgacha yo‘l qurilish ishlarini bajara olmaganliklari tufayli, obyektlar ulardan olib qo‘yilgan. Ishda yo‘l qo‘ygan xatolari uchun “Bekobod yo‘l sanoat” korxonasi rahbarlari tegishli jazoga ham tortilgan. Ammo ishlar chalaligicha qolib ketgan. 2016-yildan buyon uydum-chuqur, past-baland bo‘lib qolgan yo‘llar aholining haqli e’tiroziga sabab bo‘lib kelmoqda, — deyiladi deputatlik guruhi bergan ma’lumotnomada.
Qo‘shimcha qilinishicha, o‘rganilgan holat Dehqonobod tumani hokimligida muhokama qilingan.
Muhokamada so‘zga chiqqan deputatlar va partiya faollari so‘nggi yillarda mamlakatimizda yo‘l qurilishi borasida haydovchi va yo‘lovchilar uzog‘ini yaqin qilish, chor atrof havosi musaffoligini ta’minlash, yo‘llarni xalqaro me’yorlar darajasiga keltirish va yo‘l harakati xavfsizligini ta’minlash borasida bir qator islohotlar amalga oshirilayotganini, biroq bu islohotlar tumanni chetlab o‘tayotganini alohida ta’kidladi. Deputatlar tomonidan yo‘l qurilishiga yangicha yondashuvlarni joriy qilib, sifatni oshirish, sohani raqamlashtirish va xususiy sektorni keng jalb qilish, yo‘l sifatini tekshiradigan zamonaviy texnikalarni boshqara oladigan malakali kadrlarni shakllantirib, yo‘llarni monitoring qilishning avtomatlashgan tizimini shakllantirish borasida ham amaliy takliflar bildirildi, — deydi deputatlar.
Tuman kengashi deputati G‘ofur Valiyev Dehqonobod — Boshchorbog‘ avtomobil yo‘lining talabga javob bermasligini aytmoqda.
Kichik o‘ra daryosi bo‘yidagi “Chambil” mahallasida yashayman. Bu yerdagi Usmon Yusupov, Beliboyli va Boshchorbog‘ hududida 12 ta mahalla bor. Dehqonobod –Boshchorbog‘ avtomobil yo‘lining 0-54 kilometr oralig‘i mashina va yo‘lovchilar yurishiga jiddiy muammo tug‘dirmoqda. Bahor oylarida sel kelsa, yo‘llarni yuvib ketadi va odamlar juda qiynalib qoladi. Shu hududda yashovchi odamlar nomidan 70 km yo‘lni ta’mirlab berishlarini so‘rab, bormagan, yozmagan joyimiz qolmadi. Kelishadi, ko‘rishadi, va’da berishadi. Ammo hech qanday o‘zgarish bo‘lmayapti. “Yo‘l azobi – go‘r azobi”, deyishgan ota-bobolarimiz. Yo‘lsozlik borasida amalga oshirilayotgan ishlar pirovardida yo‘llar yo‘lovchiga azob emas, madaniy hordiq bag‘ishlashi zarur. Dehqonobodda hozircha buning aksi bo‘lyapti, — deydi xalq deputatlari Dehqonobod tuman kengashi deputati G‘ofur Valiyev.
Deputatning aytishicha, bugungi kunda mamlakatdagi chekka-chekka qishloqlarda ham ijtimoiy infratuzilmalarni rivojlantirish borasida ko‘plab xayrli ishlar qilinyapti. Ayniqsa, ko‘p yillar o‘nqir-cho‘nqir bo‘lib, aholining haqli e’tiroziga sabab bo‘lib kelayotgan ichki yo‘llar ham ta’mirlanayotgani aholini mamnun etmoqda. Biroq yo‘lsozlar Boyqo‘rg‘on—Gumbuloq yo‘nalishidagi avtomobillar harakatlanishiga xalaqit qilayotgan, bahorgi toshqinlar natijasida yaroqsiz bo‘lib qolgan 8 kilometr yo‘lni ta’mirlashni xayollariga ham keltirishmayapti.
Prezidentning 2023-yil 10-oktyabrdagi “Yo‘l xo‘jaligi sohasini yanada takomillashtirish chora-tadbirlari to‘g‘risida”gi qarorida M-39 Toshkent—Termiz avtomobil yo‘lining 1255-1315 kilometr ( jami 60 km) qismini qayta rekonstruksiya qilish loyihasi 2024—2027-yillarda “Islom taraqqiyot” banki va OPEK xalqaro taraqqiyot jamg‘armasi mablag‘i hisobidan amalga oshirilishi ta’kidlab o‘tilgan. Bu safar ham loyiha nafsi hakalak otgan yo‘l quruvchilariga yuklatilmasin-da, aks holda dehqonobodlik haydovchilar uchun ravon yo‘llarda mashina haydash orzusi yaqin orada ro‘yobga chiqmaydi, — deydi deputatlar.
“Daryo” tuman hokimligi vakillari hamda Qashqadaryo yo‘llardan muntazam foydalanish davlat muassasasi mas’ullariga izoh berishlari uchun minbar berishga tayyorligini bildiradi.
Izoh (0)