Қашқадарё вилоятининг Деҳқонобод туманида яшовчи фуқаролар Халқ депутатлари вилоят кенгашидаги ЎзЛиДеП депутатлик гуруҳига мурожаат қилиб, туман ҳудудидаги йўллар яроқсиз ҳолга келиб қолганини, бу ҳайдовчилар ва йўловчиларга ноқулайлик туғдираётганини айтиб, шикоят қилган. Шундан сўнг депутатлик гуруҳи аъзолари, партия фаоллари билан биргаликда туманда бўлиб йўллар ҳолатини кўздан кечирди.
Бизга вилоят автомобиль йўллари Бош бошқармаси бош мутахассиси Ойбек Элбоев, Қашқадарё йўллардан мунтазам фойдаланиш давлат муассасаси бошлиғи Нажмиддин Азимов, мазкур муассаса ҳаракат хавфсизлигини таъминлаш бош мутахассиси Илёс Юсуповлар ҳамроҳлик қилди. Биринчи манзилимиз тумандаги Гумбулоқ қишлоғи бўлди. М-39 Тошкент—Термиз йўлининг мазкур қишлоқ ҳудудидан ўтган 2 километр қисми ниҳоятда таъмирталаб. Бу ерда бошланган йўл қурилиш ишлари поёнига етказилмагани боис, йўлнинг бир томони баланд иккинчи тарафи эса паст бўлиб қолган, — дейди депутатлик гуруҳи вакиллари.
Билдирилишича, мазкур йўлнинг тумандаги “Новобод” маҳалласи ҳудудидан ўтган 1265—1297 километр қисми ҳам яроқсиз ҳолга келган.
Ҳартугул ишчи гуруҳининг ташрифи самарасиз бўлгани йўқ. Йўлсозлар бизнинг боришимиздан хабар топишгач, йўллардаги чуқурларга шағал тўлдириб, “ямаш”га киришди. Аммо бу ямоқлар бир- икки кунга дош беришини уларнинг ўзлари ҳам яхши билади, — дейди масъуллар.
Йўлсозларнинг масъулларга билдиришича, М-39 Олмаота—Бишкек—Тошкент—Термиз автомобиль йўлининг 3 километри 2006—2022 йилларда таъмирланиб, фойдаланишга топширилган.
147 километр йўлнинг 18 километри цементобетон қопламали, 80 километри асфалт бетон қоришмали ва 49 километри қора қоришмали қопламани ташкил этган. 2014 йилда мазкур автомобиль йўлининг 1265—1290, 1297—1315 километр қисмларидаги йўл қурилиш ишлари “Бекобод йўл саноат” корхонаси ва Ангрен бурғулаш портлатиш ишлари махсус бошқармасига юклатилган. Улар икки йил мобайнида йўлни таъмирлаш билан шуғулланишган. Тахминан 2016 йилгача йўл қурилиш ишларини бажара олмаганликлари туфайли, объектлар улардан олиб қўйилган. Ишда йўл қўйган хатолари учун “Бекобод йўл саноат” корхонаси раҳбарлари тегишли жазога ҳам тортилган. Аммо ишлар чалалигича қолиб кетган. 2016 йилдан буён уйдум-чуқур, паст-баланд бўлиб қолган йўллар аҳолининг ҳақли эътирозига сабаб бўлиб келмоқда, — дейилади депутатлик гуруҳи берган маълумотномада.
Қўшимча қилинишича, ўрганилган ҳолат Деҳқонобод тумани ҳокимлигида муҳокама қилинган.
Муҳокамада сўзга чиққан депутатлар ва партия фаоллари сўнгги йилларда мамлакатимизда йўл қурилиши борасида ҳайдовчи ва йўловчилар узоғини яқин қилиш, чор атроф ҳавоси мусаффолигини таъминлаш, йўлларни халқаро меъёрлар даражасига келтириш ва йўл ҳаракати хавфсизлигини таъминлаш борасида бир қатор ислоҳотлар амалга оширилаётганини, бироқ бу ислоҳотлар туманни четлаб ўтаётганини алоҳида таъкидлади. Депутатлар томонидан йўл қурилишига янгича ёндашувларни жорий қилиб, сифатни ошириш, соҳани рақамлаштириш ва хусусий секторни кенг жалб қилиш, йўл сифатини текширадиган замонавий техникаларни бошқара оладиган малакали кадрларни шакллантириб, йўлларни мониторинг қилишнинг автоматлашган тизимини шакллантириш борасида ҳам амалий таклифлар билдирилди, — дейди депутатлар.
Туман кенгаши депутати Ғофур Валиев Деҳқонобод — Бошчорбоғ автомобиль йўлининг талабга жавоб бермаслигини айтмоқда.
Кичик ўра дарёси бўйидаги “Чамбил” маҳалласида яшайман. Бу ердаги Усмон Юсупов, Белибойли ва Бошчорбоғ ҳудудида 12 та маҳалла бор. Деҳқонобод –Бошчорбоғ автомобиль йўлининг 0-54 километр оралиғи машина ва йўловчилар юришига жиддий муаммо туғдирмоқда. Баҳор ойларида сел келса, йўлларни ювиб кетади ва одамлар жуда қийналиб қолади. Шу ҳудудда яшовчи одамлар номидан 70 км йўлни таъмирлаб беришларини сўраб, бормаган, ёзмаган жойимиз қолмади. Келишади, кўришади, ваъда беришади. Аммо ҳеч қандай ўзгариш бўлмаяпти. “Йўл азоби – гўр азоби”, дейишган ота-боболаримиз. Йўлсозлик борасида амалга оширилаётган ишлар пировардида йўллар йўловчига азоб эмас, маданий ҳордиқ бағишлаши зарур. Деҳқонободда ҳозирча бунинг акси бўляпти, — дейди халқ депутатлари Деҳқонобод туман кенгаши депутати Ғофур Валиев.
Депутатнинг айтишича, бугунги кунда мамлакатдаги чекка-чекка қишлоқларда ҳам ижтимоий инфратузилмаларни ривожлантириш борасида кўплаб хайрли ишлар қилиняпти. Айниқса, кўп йиллар ўнқир-чўнқир бўлиб, аҳолининг ҳақли эътирозига сабаб бўлиб келаётган ички йўллар ҳам таъмирланаётгани аҳолини мамнун этмоқда. Бироқ йўлсозлар Бойқўрғон—Гумбулоқ йўналишидаги автомобиллар ҳаракатланишига халақит қилаётган, баҳорги тошқинлар натижасида яроқсиз бўлиб қолган 8 километр йўлни таъмирлашни хаёлларига ҳам келтиришмаяпти.
Президентнинг 2023 йил 10 октябрдаги “Йўл хўжалиги соҳасини янада такомиллаштириш чора-тадбирлари тўғрисида”ги қарорида М-39 Тошкент—Термиз автомобиль йўлининг 1255-1315 километр ( жами 60 км) қисмини қайта реконструкция қилиш лойиҳаси 2024—2027 йилларда “Ислом тараққиёт” банки ва ОПЕК халқаро тараққиёт жамғармаси маблағи ҳисобидан амалга оширилиши таъкидлаб ўтилган. Бу сафар ҳам лойиҳа нафси ҳакалак отган йўл қурувчиларига юклатилмасин-да, акс ҳолда деҳқонободлик ҳайдовчилар учун равон йўлларда машина ҳайдаш орзуси яқин орада рўёбга чиқмайди, — дейди депутатлар.
“Дарё” туман ҳокимлиги вакиллари ҳамда Қашқадарё йўллардан мунтазам фойдаланиш давлат муассасаси масъулларига изоҳ беришлари учун минбар беришга тайёрлигини билдиради.
Изоҳ (0)