2023-yilda dunyo bo‘ylab bor-yo‘g‘i o‘nta mamlakat va hududda havoni ifloslantiruvchi PM2.5 darajasi global sog‘liqni saqlash standartlariga javob berdi.
Bunday ma’lumotlar Shveysariyaning IQAir tadqiqot tashkilotining havo sifati bo‘yicha yillik hisobotida keltirilgan. Jami 134 ta davlat va 7 812 ta shaharda havoning ifloslanish darajasi baholandi.
IQAir ta’kidlaganidek, havo ifloslanishi dunyo bo‘ylab har to‘qqizta o‘limga sabab bo‘ladi va inson salomatligi uchun eng jiddiy ekologik tahdiddir. Yuqori darajadagi PM2.5 moddalar (zarrachalar diametri 2,5 mikrongacha bo‘lgan atmosferani ifloslantiruvchi moddalar) astma, saraton, insult va o‘pka kasalliklari qo‘zg‘atadi.
IQAir hisob-kitoblariga ko‘ra, Fransiyaga qarashli Polineziya hududi 2023-yilda eng toza havoga ega bo‘lgan joy hisoblanadi. Shuningdek, Mavrikiy, Islandiya, Grenada, Bermud, Yangi Zelandiya, Avstraliya, Puerto-Riko, Estoniya va Finlyandiyada ham havo standartlarga javob bergan.
IQAir ma’lumotlariga ko‘ra, eng iflos havoga ega mamlakat Bangladesh bo‘lib, u erda PM2.5 darajasi xavfsiz darajadan o‘n baravar yuqori.
Toshkent shahri ham IQAir reytingida bir necha marotaba havosi eng iflos bo‘lgan shaharlar qatoridan o‘rin olgan.
Izoh (0)