Surxondaryoda Soliq inspeksiyasi xodimi bilan janjallashgan sotuvchi ayollar jarimaga tortildi. Bu haqda Surxondaryo viloyati soliq boshqarmasi matbuot xizmati xabar berdi.
13-mart kuni Soliq inspeksiyasi xodimi va bozorda savdo qiluvchi ayol o‘rtasida janjal bo‘lgani haqida videolavhalar tarqaldi. O‘sha kuni holat bo‘yicha xizmat o‘rganishi tayinlangani aytilgandi.
15-mart kuni viloyat soliq boshqarmasi holat bo‘yicha maʼlumot berdi. Taʼkidlanishicha, 12-mart kuni Uzun tumani soliq inspeksiyasi xodimlari tomonidan tumanning “Bahoriston” mahallasi hududida savdo qilish uchun belgilanmagan joylarda noqonuniy faoliyatning oldini olishga qaratilgan tadbirlar belgilangan tartiblarga asosan o‘tkazilgan.
Tadbir davomida mutasaddilar tomonidan ko‘p marotaba ogohlantirishlarga qaramay, qonunga zid hamda antisanitariya holatida savdo faoliyatini davom ettirib kelayotgan fuqarolar Sh.T. hamda S.T. soliq inspeksiyasi xodimi F.Ergashevning noqonuniy savdo faoliyatini rasmiylashtirish talabiga qarshilik ko‘rsatib, janjal ko‘tarishgan va davlat xizmatchisini obro‘sizlantirishga harakat qilishgan.
Holat yuzasidan jinoyat ishlari bo‘yicha Uzun tumani sudining qaroriga asosan Sh.T. hamda S.T.ga nisbatan maʼmuriy tartibda chora ko‘rilganligi maʼlum bo‘lgan.
Bundan tashqari, Surxondaryo viloyati soliq xodimlari orasida yig‘ilish o‘tkazilib, har bir xodim davlat xizmatchisining Ichki mehnat tartib va odob-axloq qoidalari talablariga rioya qilishi yuzasidan ogohlantirilgan.
“Zo‘r TV” telekanalining “Bu kun” informatsion dasturida xabar berilishicha, sud ikki fuqaroga nisbatan Maʼmuriy javobgarlik to‘g‘risidagi kodeksning 34-moddasi (bir necha huquqbuzarlikni sodir etganlik uchun maʼmuriy jazo qo‘llanish)ga asosan BHMning 3 baravari – 1 mln 020 ming so‘m miqdorida jarima jazosini tayinlagan.
Izoh (0)