Samarqandda sotuvchi yigit 16 kishi tomonidan kaltaklandi (video)

Samarqand viloyati Narpay tumanidagi bozorlarning birida sotuvchi yigit 16 kishi tomonidan kaltaklandi. Bu haqda “Millar” dasturida xabar berildi. 

Xabarga ko‘ra, voqea 17-aprel kuni tumandagi “Mirbozor” bozorida, sotuvchi ayolning farzandi va nazoratchilar o‘rtasida sodir bo‘lgan. Jabrlanuvchining xolasi jiyani talaba ekanini, 16 kishi tomonidan asossiz kaltaklanganini aytib o‘tgan. Shuningdek, onasi bozor maʼmuriyatidagi nazoratchilarning farzandida qanday xusumati bo‘lganini bilmasligini qayd etgan. 

“Hech kim xabar olmadi: na bozor maʼmuriyati, na nazoratchilar. Bir o‘zim yugurib yuribman”, — deydi ayol. 

Bozor nazoratchisi esa 4-5 kishi birgalikda uni kaltaklashganini aytgan. Biroq videoda buning aksi tasvirlangan. Voqea sodir bo‘lgach nazoratchi jabrlanuvchining oila aʼzolariga turli tahdidli xabarlar ham yuborgan. 

Maʼlum qilinishicha, hozirda bemorning ahvoli nisbatan qoniqarli. Holat yuzasidan tergovga qadar tekshiruv ishlari olib borilmoqda.