Surxondaryo viloyati Termiz shahridagi bozorda 4-yanvar kuni sotuvchilar huquq-tartibot idoralari xodimlariga qarshilik ko‘rsatib, jamoat tartibini buzdi. Ichki ishlar vazirligi axborot xizmati holat yuzasidan ma’lumot berdi.
Qayd etilishicha, “Yubileyniy” bozor hududida noqonuniy savdo ishlari bilan shug‘ullanuvchi shaxslarni shahar hokimining qarori bilan “Yashil dunyo” savdo markaziga ko‘chirish ishlari amalga oshirilgan.
Ijtimoiy tarmoqlarda Termizda ichki ishlar xodimlari ayollarni majburlab avtobusga chiqargani haqida tasvirlar tarqaldi. Videoda xodimlar fuqarolarni maxsus avtobusga majburan chiqarayotganini ko‘rish mumkin.
Bundan oldin yangi hududdan savdo rastalari ajratilib, eski hududni tark etish haqida ogohlantirilganiga qaramasdan bir guruh sotuvchilar norozilik bildirib, hokimiyat vakillariga qarshilik ko‘rsatgan va jamoat tartibini buzgan.
Bozor hududiga jamoat tartibini tiklash uchun jalb qilingan Ichki ishlar organlari va Milliy gvardiya xodimlari tomonidan 14 nafar huquqbuzarlar IIBga olib kelingan va ular bilan tushuntirish-profilaktik ishlari olib borilgan.
Huquqbuzarlik holati yuzasidan to‘plangan hujjatlar asosida Jinoyat ishlari bo‘yicha Termiz shahar sudi tomonidan 6 nafar fuqaroga BHMning 3 baravari miqdorida, 3 nafar fuqaroga BHMning 5 baravari miqdorida jarima, 4 nafar fuqaroga esa 5 sutka ma’muriy qamoq jazolari tayinlandi.
Izoh (0)