Toshkent viloyati Bo‘stonliq tumanida elektr energiyasidan noqonuniy foydalangan dalahovlilar aniqlandi, deb xabar beradi Bosh prokuratura huzuridagi departament.
Qayd etilishicha, departamentning Bo‘stonliq tuman bo‘limi tomonidan tergovga qadar tekshiruvlar o‘tkazilgan. Tekshiruvlar davomida “T.S.” va “Ch.T.” oilaviy korxonasi rahbarlari “Do‘stlik” hamda “Chimgan” MFY hududidagi tijorat maqsadida foydalanib kelgan dalahovlilarini o‘zboshimchalik bilan elektr tarmog‘iga to‘g‘ridan to‘g‘ri ulab, jami 241,7 million so‘mlik elektr energiyasini o‘g‘irlaganliklari aniqlangan.
Mazkur holatlar yuzasidan Jinoyat kodeksining 169-moddasi (o‘g‘rilik) bilan jinoyat ishlari qo‘zg‘atilib, tergov harakatlari o‘tkazilmoqda.
Avvalroq “O‘zenergoinspeksiya” O‘zbekistonda 2024-yilning o‘tgan davrida tabiiy gaz va elektr energiyasidan noqonuniy foydalanilishi natijasida davlat manfaatlariga jami 215 milliard 648 million so‘m zarar yetkazilgani to‘g‘risida xabar bergandi.
Izoh (0)