14-mart kuni Rossiya Birlashgan Millatlar Tashkiloti Xavfsizlik kengashidan “Shimoliy oqim” gaz quvurlaridagi qo‘poruvchilik harakatlarini tergov qilish yuzasidan yig‘ilish o‘tkazishni talab qildi. Bu haqda Rossiyaning BMTdagi doimiy vakili birinchi o‘rinbosari Dmitriy Polyanskiy xabar bergan, deb yozadi “TASS”.
“Biz BMT Xavfsizlik kengashidan ‘Shimoliy oqim’dagi teraktlar bo‘yicha xalqaro tekshiruv o‘tkazilishini yana bir bor talab qilamiz. Bu masalani yopiq eshiklar ortida o‘tkaziladigan uchrashuvda hal qilish borasida talabnoma jo‘natdik. Keyinroq jurnalistlarga tafsilotlarni ochiqlashni rejalashtirmoqdamiz”, — deyiladi Rossiya tomoni bergan bayonotda.
Dmitriy Polyanskiyga ko‘ra, Daniya va Shvetsiya gaz quvurlariga hujumlar yuzasidan o‘z tergovlarini tugatgan. Biroq ular vaqtdan yutishni hamda teraktning asosiy sodir etuvchilarini ommaga ochiqlamaslikni xohlashmoqda. Voqea yuzasidan Berlindagi hukumat ham nisbatan faol ish olib bormoqda.
2022-yil 27-sentyabrda Nord Stream AG shirkati “Shimoliy oqim” gaz quvurining uchta dengizosti liniyasi kuchli portlashdan zararlanganini maʼlum qilgan edi. Keyinroq shved seysmologlari 2022-yil 26-sentyabr kuni “Shimoliy oqim” quvurlari yo‘nalishida ikkita portlash sodir bo‘lganini aniqlashganini aytishgan. Hodisadan so‘ng Rossiya Bosh prokuraturasi xalqaro terrorizm harakati bo‘yicha jinoyat ishi qo‘zg‘atgan edi. Germaniya, Daniya va Shvetsiya terakt yuzasidan o‘z tekshiruvlarini o‘tkazgan, ammo tekshiruvlarda Rossiyaning ishtiroki keskin rad etilgan.
2023-yil 8-fevralda amerikalik tadqiqotchi jurnalist Seymur Xersh anonim manbalarga tayanib, AQSH dengiz floti g‘avvoslari “Shimoliy oqim 1” va “Shimoliy oqim 2” gaz quvurlari ostiga 2022-yil iyun oyida portlovchi moslamalar joylashtirgani haqida maqola chop etdi. Oradan uch oy o‘tib esa, Norvegiya maxsus xizmatlari bombalarni faollashtirgani aytilgan.
Bir qancha G‘arb nashrlari gaz quvurlaridagi portlashlar Yevropa ichkarisidagi mustaqil ukrainparast guruhlar tomonidan amalga oshirilgani haqidagi farazlarni jamoatchilikka sizdirgan edi.
Izoh (0)