14 март куни Россия Бирлашган Миллатлар Ташкилоти Хавфсизлик кенгашидан “Шимолий оқим” газ қувурларидаги қўпорувчилик ҳаракатларини тергов қилиш юзасидан йиғилиш ўтказишни талаб қилди. Бу ҳақда Россиянинг БМТдаги доимий вакили биринчи ўринбосари Дмитрий Полянский хабар берган, деб ёзади “ТАСС”.
“Биз БМТ Хавфсизлик кенгашидан ‘Шимолий оқим’даги терактлар бўйича халқаро текширув ўтказилишини яна бир бор талаб қиламиз. Бу масалани ёпиқ эшиклар ортида ўтказиладиган учрашувда ҳал қилиш борасида талабнома жўнатдик. Кейинроқ журналистларга тафсилотларни очиқлашни режалаштирмоқдамиз”, — дейилади Россия томони берган баёнотда.
Дмитрий Полянскийга кўра, Дания ва Швеция газ қувурларига ҳужумлар юзасидан ўз терговларини тугатган. Бироқ улар вақтдан ютишни ҳамда терактнинг асосий содир этувчиларини оммага очиқламасликни хоҳлашмоқда. Воқеа юзасидан Берлиндаги ҳукумат ҳам нисбатан фаол иш олиб бормоқда.
2022 йил 27 сентябрда Nord Stream АG ширкати “Шимолий оқим” газ қувурининг учта денгизости линияси кучли портлашдан зарарланганини маълум қилган эди. Кейинроқ швед сейсмологлари 2022 йил 26 сентябрь куни “Шимолий оқим” қувурлари йўналишида иккита портлаш содир бўлганини аниқлашганини айтишган. Ҳодисадан сўнг Россия Бош прокуратураси халқаро терроризм ҳаракати бўйича жиноят иши қўзғатган эди. Германия, Дания ва Швеция теракт юзасидан ўз текширувларини ўтказган, аммо текширувларда Россиянинг иштироки кескин рад этилган.
2023 йил 8 февралда америкалик тадқиқотчи журналист Сеймур Херш аноним манбаларга таяниб, АҚШ денгиз флоти ғаввослари “Шимолий оқим 1” ва “Шимолий оқим 2” газ қувурлари остига 2022 йил июнь ойида портловчи мосламалар жойлаштиргани ҳақида мақола чоп этди. Орадан уч ой ўтиб эса, Норвегия махсус хизматлари бомбаларни фаоллаштиргани айтилган.
Бир қанча Ғарб нашрлари газ қувурларидаги портлашлар Европа ичкарисидаги мустақил украинпараст гуруҳлар томонидан амалга оширилгани ҳақидаги фаразларни жамоатчиликка сиздирган эди.
Изоҳ (0)