Dunyodagi eng yirik texnologik anjumanlardan biri bo‘lgan Web Summit konferensiyasi Qatarda bo‘lib o‘tdi. Bu safargi konferensiyaning Qatarda o‘tishi Yaqin Sharq uchun katta tashabbus bo‘ldi va taqdim etilgan loyihalar to‘liq sotildi. Dohada bir hafta davomida startaplar, tijorat inkubatorlari va texnologiya ishqibozlari yig‘ilgan tadbirda 15 000 dan ortiq kishi qatnashdi, jumladan, O‘zbekistondan 50 nafar vakildan iborat delegatsiya ishtirok etdi. Delegatsiya tarkibida O‘zbekiston raqamli texnologiyalar vaziri o‘rinbosari Rustam Karimjonov ham bor edi.
Sammitda “Daryo” muxbiri bilan suhbatda u O‘zbekiston va Qatar o‘rtasidagi aloqalarni chuqurlashtirish istiqbollari hamda ular iqtisodiy o‘sish va jamiyat taraqqiyoti uchun raqamli texnologiyalardan birgalikda qanday foydalanishi mumkinligi haqida gapirdi.
Qatar—O‘zbekiston munosabatlarini mustahkamlash
Vazir o‘rinbosari O‘zbekiston va Qatar o‘rtasidagi munosabatlar gullab-yashnayotganini alohida taʼkidlab, buni har ikki davlat xalqining samimiyati va mehmondo‘st tabiati bilan izohladi. “Hozirgi kunlarda aloqalar juda yaxshi, – dedi Karimjonov Qatardagi yirik kompaniyalar va davlat idoralari bilan hamkorlik qilish qulayligini taʼkidlab. O‘tgan yili har ikki davlat rahbarlari yil davomida bir necha bor uchrashib, ikki davlat fuqarolari uchun viza tartibini yengillashtirdi. Aloqalar yaxshilanganidan yana bir dalolat sifatida, Karimjonov muloqot qilish qulayligi va umumiy madaniy qadriyatlar kelgusidagi hamkorlik uchun mustahkam zamin yaratganini ham taʼkidladi. “Ularga O‘zbekistondan ekaningizni aytsangiz, barchalar “do‘st mamlakat” deb eʼtirof etishadi”, — dedi Karimjonov nutqida.
Web Summit’dagi startaplar: O‘zbekistonning raqamli isteʼdodlari namoyish etildi
Karimjonov O‘zbekiston sammitga 50 ga yaqin ishtirokchi va 10 ta startap olib kelganini faxr bilan taʼkidladi. Ushbu startaplardan biri bo‘lgan IMAN loyihasi PITCH finaliga chiqdi va xalqaro tanlovda kuchli 3 talikdan biri sifatida eʼtirof etildi. Tadbirda ishtirok etgan bir qator O‘zbekiston startaplari hozirda Qatarda ham o‘z vakolatxonalarini ochish jarayonida. U mamlakatning yosh, raqamli malakaga ega aholisiga autsorsing imkoniyatlarini taklif qilish, ularni sohaga jalb qilishga qaratilgan hukumat eʼtibori masalasiga to‘xtalgan va unga yuksak baho bergan: “Shu tariqa ular bizning isteʼdodlarimizdan foydalanadilar, bu biz uchun ham, Qatar uchun ham yaxshi, chunki ularda inson resurslari yo‘q, bu konferensiyada taqdim qilinayotgan maqsadli loyihalarni amalga oshirish uchun yetarli inson resurslari ularda mavjud emas”.
Texnika sohasida ayollar va qizlarning imkoniyatlarini kengaytirish
O‘zbekiston Raqamli texnologiyalar vazirligi
Texnologiyalar sohasidagi gender nomutanosibliklariga to‘xtalar ekan, Karimjonov ayollarni AKT sohasiga ko‘proq jalb qilish tashabbuslari bilan o‘rtoqlashdi va qizlar o‘rtasida ko‘proq muvaffaqiyat hikoyalari zarurligini taʼkidladi. Karimjonov tan olib eslagan eng katta to‘siq shuki, qizlarning oilalari fikri hali o‘zgarishi kerak va IT sohasidagi mehnatning qadr-qimmatini insonlarga tushuntirilishi kerak. “IT sohasiga qizlarni jalb qilish ham O‘zbekistonning ustuvor yo‘nalishlaridan biridir”, — degan Karimjonov.
O‘zbekiston vakili ,shuningdek, ijtimoiy stereotiplar va muammolarni eʼtirof etib, soha imkoniyatlarini ham taʼkidladi: “Agar siz raqamli sohada bilim-ko‘nikmaga ega bo‘lsangiz, uyda qolish va bolalaringizni tarbiyalash bilan bir paytda, pul ishlash va oilangizga yordam berishni ham amallay olasiz”. Bu O‘zbekiston ayollari uchun moliyaviy jihatdan mustaqil bo‘lish va mehnatni madaniy talablar bilan muvozanatlash uchun yana bir yo‘l bo‘lardi.
Infratuzilma muammolarini yengish
O‘zbekistonning IT-sohasini rivojlantirish yo‘lidagi eng katta to‘siqlardan biri bu beqaror elektr taʼminotidir. Karimjonov shu kabi infratuzilma masalalariga, xususan, IT-sohasining poytaxtdan tashqarida rivojlanishini qo‘llab-quvvatlash uchun barqaror elektr energiyasi va internetga ulanish zarurligiga ham to‘xtalib o‘tdi. U buning autsorsing kompaniyalari uchun ahamiyatini tushuntirib, “ayniqsa, autsorsing kompaniyalari uchun barqaror energiya resurslari juda muhim. Bu juda muhim”, dedi. Uning qo‘shimcha qilishicha, mamlakat elektr tarmog‘ini yaxshilash va internetdan foydalanish imkoniyatlarini oshirish bo‘yicha ishlar olib bormoqda.
Kelajakka nazar
Vazir o‘rinbosari AKT sohasida xalqaro hamkorlik va IT-taʼlimga sarmoya kiritish orqali o‘sish imkoniyatlari haqida optimistik fikr bildirdi. U O‘zbekiston o‘zining strategik mavqeyi va raqamli isteʼdodlaridan foydalanib, global IT landshaftining asosiy o‘yinchisiga aylanishiga umid bildirdi.
O‘zbekiston va Qatar o‘rtasidagi muloqot hamkorlikning yangi yo‘llarini ochib beradi, bu ikki davlatga katta sarmoya kiritish, bilim almashish va texnologik taraqqiyotni taʼminlaydi. O‘zbekistonda “Qatar kunlari” tadbirini o‘tkazish rejalari va kelajakdagi hamkorlik bo‘yicha davom etayotgan munozaralar bilan iqtisodiy va ijtimoiy taraqqiyot uchun raqamli innovatsiyalar kuchidan foydalanadigan hamkorlikni chuqurlashtirish uchun zamin hozirlanmoqda.
Toni Kryuger tayyorladi
Dunyo yangiliklaridan xabardor bo‘lish uchun “Daryo”ning Instagram va Twitterdagi rasmiy sahifalarini kuzatib boring.
Izoh (0)