Prezident tomonidan 13-mart kuni imzolangan qonun bilan Ma’muriy javobgarlik to‘g‘risidagi kodeksga qo‘shimcha va o‘zgartirishlar kiritildi.
Unga ko‘ra, o‘rmonlarda yong‘in xavfsizligi talablarini buzish, agar yong‘in chiqishiga olib kelgan bo‘lsa, quyidagi miqdorda jarima solishga sabab bo‘lishi belgilandi:
- fuqarolarga BHMning 10 baravaridan 15 baravarigacha (3,4 million so‘mdan 5,1 million so‘mgacha);
- mansabdorlarga BHMning 20 baravaridan 25 baravarigacha (6,8 million so‘mdan 8,5 million so‘mgacha).
Shuningdek, shaxsning ehtiyotsizligi yoki yong‘in xavfsizligi qoidalarini buzganligi tufayli uy-joy fondida odamlarning sog‘lig‘iga zarar yetishi yoxud o‘zganing mol-mulki shikastlanishi yoki uning yo‘q qilinishi bilan bog‘liq bo‘lmagan tarzda yong‘in sodir bo‘lganda mazkur shaxs yong‘in xavfsizligi qoidalarini buzganlik uchun ma’muriy javobgarlikdan ozod qilinadi.
Ushbu qonun Senat tomonidan 9-fevral kuni ma’qullangandi. Qonun muhokamasida senator Tolibjon Madumarov bugungi kunda yong‘in xavfsizligi qoidalarini buzgan huquqbuzarlarga nisbatan qo‘llanayotgan yengil jazo choralari kutilayotgan natijani bermayotganini aytib o‘tgandi.
Ma’lumotlarga ko‘ra, 2023-yilda 10 ming 204 ta yong‘in hodisasi yuz berib, unda 251 nafar fuqaro jabrlangan, shundan 79 nafari vafot etgan, jismoniy va yuridik shaxslarga esa 270,4 milliard so‘mlik zarar yetkazilgan. 2018—2022-yillarda respublika o‘rmon xo‘jaliklarida jami 40 ta yong‘in hisobga olinib, natijada 431 gektar o‘rmonzorlarga jiddiy ziyon va 20,296 milliard so‘mdan ziyod zarar yetgan.
Qonun rasmiy e’lon qilingan kundan e’tiboran 3 oy o‘tgach kuchga kiradi.
Izoh (0)