MMA jangchilari Neyt Dias va Xorxe Masvidal boks qoidalari bo‘yicha jang qiladi.
Bu haqida jurnalist Ariel Helvani ma’lum qildi.
Ular o‘rtasidagi jang 1-iyun kuni Kaliforniya shtatining Inglvud shahrida bo‘lib o‘tadi. Boks qoidalari bo‘yicha kechadigan jang yarim yengil vazn toifasida (-79 kg) va 10 raund bo‘lib o‘tishi belgilangan.
Masvidal so‘nggi bor 2023-yil aprel oyida UFC 287 doirasida Gilbert Byornsga qarshi jang qilgan va mag‘lub bo‘lgandi.
Dias uchun esa bu boks qoidalari bo‘yicha ikkinchi jang hisoblanadi. O‘tgan yilning avgust oyida Neyt bloger Jeyk Polga qarshi ringga ko‘tarilib, ochkolar evaziga mag‘lubiyatga uchragandi.
Qayd etib o‘tish joiz, Dias va Masvidal 2019-yilda UFC 244 doirasida yuzma-yuz kelgan. Unda Xorxe texnik nokaut evaziga g‘alaba qozongandi.
Izoh (0)