Janubiy Karolinada Boeing’ning sifat nazorati bo‘yicha sobiq muhandisi, kompaniyaning ishlab chiqarish standartlarini qayta-qayta tanqid qilgan Jon Barnett o‘lik holda topildi. Bu haqda BBC xabar berdi.
Jasad mehmonxona avtoturargohidagi mashina ichidan topilgan. Tergov ma’lumotlariga ko‘ra, 62 yoshli muhandis 9-mart, shanba kuni “o‘z-o‘ziga yetkazgan” jarohatidan vafot etgan. Muhandis Charlstonda kompaniyaga qarshi sud ishi doirasida guvohlik bergan, u bilan kompaniyaning advokatlari suhbatlashgan. So‘rov shanba kuni davom etishi kerak edi, biroq Barnett kelmagan, shundan so‘ng kompaniya vakillari mehmonxona ma’muriyati bilan bog‘langan.
Barnett Boeing kompaniyasida 32 yil ishlagan. U 2010-yildan 787 ta Dreamliner ishlab chiqargan Shimoliy Charlston zavodida muhandislik qilgan, 2017-yilda sog‘lig‘i sababli nafaqaga chiqqan. 2019-yilda u Janubiy Karolinadagi zavodda ishchilar montaj vaqtida sifatsiz qismlarni o‘rnatgani va kislorod niqoblari bilan bog‘liq jiddiy muammolar borligini da’vo qilgan.
Boeing bu ayblovlarni rad etgan, biroq Federal aviatsiya boshqarmasi tomonidan olib borilgan tergov Barnettning ba’zi da’volari isbotlanganini tasdiqlagan. Boeing’dan vaziyatni to‘g‘irlash uchun choralar ko‘rish talab qilingan. Muhandisning o‘limi Boeing kompaniyasining 737 MAX samolyoti ustidan tekshiruvlar chog‘ida sodir bo‘lgan.
6-yanvar kuni Alaska Airlines aviakompaniyasining Portlenddan Kaliforniya shtatining Ontario shahriga yo‘l olgan 1282 reysining chiqish eshigi parvoz paytida uzilib ketgan. Keyinchalik bir nechta 737 MAX samolyotlarining qismlari to‘g‘ri o‘rnatilmagani aniqlangan. Natijada AQSHda ushbu samolyotlarning parvozlari to‘xtatilgan. The Hill nashrining yozishicha, Barnettning da’volari 737 MAX mojarosiga aloqador emas edi.
Izoh (0)