Ukraina tomonida jang qilayotgan “Rossiyaga ozodlik” legioni va “Sibir batalyoni” 12-martga o‘tar kechasi Rossiya chegarasini kesib o‘tib, rus armiyasi bilan to‘qnashganini ma’lum qilgandi. Rossiya Mudofaa vazirligi holat yuzasidan bayonot berdi. Bu haqda “RIA Novosti” xabar berdi.
Mudofaa vazirligiga ko‘ra, Ukraina “xavfsizlik kuchlari” Belgorod va Kursk viloyatlariga bostirib kirishga uringan. Avvalroq Ukraina razvedkasi yuqoridagi tuzilmalar Rossiya fuqarolaridan tashkil topganini aytgandi.
“Moskva vaqti bilan ertalab soat 03:00 larda tanklar va zirhli jangovar texnikalar ko‘magida tinch aholi nishonlarini shiddatli o‘qqa tutgan Ukraina terrorchilik tuzilmalari Rossiya hududiga bostirib kirishga harakat qildi.
Ular Belgorod viloyatidagi Odnorobovka, Nexoteyevka va Spodaryushino aholi punktlari hududlarida bir vaqtning o‘zida uch yo‘nalishda hujum qilishga uringan. Rossiya harbiylari barcha hujumlarni qaytardi, dushmanga aviatsiya, raketa kuchlari va artilleriya bilan zarba berdi. Davlat chegarasi buzilishiga yo‘l qo‘yilmagan. Ukraina tomonidan chegaradosh Odnorobovka hududida 60 ga yaqin hujumchi, Nexoteyevka hududida uchta tank va bir bronetransportyor, Spodaryushino hududida esa yana ikkita tank yo‘q qilingan”, — deyiladi bayonotda.
Bundan tashqari, ertalab soat 08:00 da Kursk viloyatining Tyotkino hududidaga kirishga uringan Ukraina “sabotaj va razvedka guruhlari”ning to‘rtta hujumi qaytarilgani aytilgan.
“Dushman orqaga siljigan va katta yo‘qotishlarga uchragan”, — deyiladi xabarda.
Izoh (0)