Indoneziyada parvoz vaqti uchuvchilar uxlab qoldi

Indoneziyada mahalliy Batik Air aviakompaniyasining ikki uchuvchisi parvoz vaqtida 28 daqiqa davomida uxlab qoldi. Bu haqda BBC xabar berdi.

Hodisa 25-yanvar kuni Sulavesidan Jakartaga parvoz qilayotgan samolyotda sodir bo‘lgan. Uchuvchilardan biri yangi tug‘ilgan egizaklariga qaragani uchun charchaganini, shu sababli ish vaqtida uxlab qolganini aytgan.

Airbus A320 qisqa muddatga yo‘nalishdan chiqib ketgan, biroq xavfsiz qo‘ngan. Barcha 153 yo‘lovchi va ekipaj a’zolari hech qanday zarar ko‘rmagan. 32 yoshli uchuvchi havoga ko‘tarilganidan yarim soat o‘tgach, ikkinchi uchuvchiga boshqaruvni topshirgan. Transport vazirligi xabariga ko‘ra, 28 yoshli ikkinchi uchuvchi bunga rozi bo‘lgan.

Ammo ikkinchi uchuvchi ham beixtiyor uxlab qolgan. Xabarda aytilishicha, uning rafiqasi endigina bir oylik egizak chaqaloqlarni dunyoga keltirgan va uchuvchi rafiqasiga bola parvarishida yordam bergan. Jakarta havo harakatini boshqarish xizmati Batik Air A320 samolyotining kokpiti bilan ulanishga harakat qilgan, biroq javob olmagan.

Radio sukunati yetakchi uchuvchi uyg‘onib, ikkinchi uchuvchi ham uxlab qolganini anglaguniga qadar 28 daqiqa davom etgan. Shuningdek, u samolyot qisqa muddatga yo‘nalishdan chiqib ketganini aniqlagan.

Shundan so‘ng uchuvchilar Jakartadan kelgan qo‘ng‘iroqlarga javob bergan va samolyotni eson-omon qo‘ndirgan. Parvoz oldidan o‘tkazilgan tibbiy ko‘riklar erkaklar uchishga yaroqli ekanini ko‘rsatgan. Ularning qon bosimi va yurak urishi normal bo‘lgan, spirtli ichimliklar testlari salbiy chiqqan.

Ammo uchuvchilar to‘liq dam olganga o‘xshasa-da, sinovlar ularning dam olish sifati yaxshi ekanini aniqlay olmadi, — deydi aviatsiya mutaxassisi Alvin Li.

Hodisa yuzasidan rasmiylar Batik Air aviakompaniyasiga “qattiq tanbeh” bergan, Indoneziya aviatransporti rahbari M. Kristi Endah Murni Batik Air o‘z ekipajining dam olish vaqtiga ko‘proq e’tibor qaratishini ta’kidladi.

Batik Air “tegishli dam olish siyosati bilan ishlayotganini” va “xavfsizlik bo‘yicha barcha tavsiyalarni bajarish majburiyatini olganini” aytdi.