Toshkent viloyatidagi chegara bojxona postida zargarlik buyumlarini yashirincha olib o‘tishga uringan fuqaro to‘xtatib qolindi. Bu haqda viloyat bojxona boshqarmasi matbuot xizmati xabar berdi.
Qayd etilishicha, O‘zbekistonga o‘tish uchun “G‘ishtko‘prik” chegara bojxona postiga piyoda holda kirib kelgan fuqaro o‘z harakatlari bilan bojxona xodimlarida shubha uyg‘otgani sababli ikki nafar xolis ishtirokida shaxsiy ko‘rikdan o‘tkazilgan.
Natijada, fuqaroning bel qismi orqa tomoni shimining ichiga bojxona nazoratidan yashirilgan, qora rangli maxsus o‘ramda, qiymati 82 million so‘mlik, vazni 110,97 gramm zargarlik buyumlari borligi aniqlandi.
Hozirda holat yuzasidan bojxona organlari tomonidan dastlabki surishtiruv harakatlari olib borilmoqda.
Amaldagi tartiblarga muvofiq, jismoniy shaxslar bojxona chegarasi orqali bojxona to‘lovlarisiz, yo‘lovchi bojxona deklaratsiyasida ko‘rsatgan holda umumiy og‘irligi 65 grammdan ko‘p bo‘lmagan qimmatbaho metallar va qimmatbaho toshlardan zargarlik buyumlarini olib kirishlari mumkin.
Eslatib o‘tamiz, 2023-yil aprel o‘rtalarida Hindistonda Indira Gandi aeroportidan 3,2 kilogramm oltinni noqonuniy olib o‘tmoqchi bo‘lgan o‘zbekistonlik erkak ushlangan edi. O‘zbekiston fuqarosi Dubay reysini amalga oshirish uchun Chandigarh aeroportiga qochib ketgan payti qo‘lga tushgan.
Izoh (0)