Hindistondan 3,2 kg oltinni olib chiqishga uringan o‘zbekistonlik erkak ushlandi

Hindistonda Indira Gandi aeroportidan 3,2 kilogramm oltinni noqonuniy olib o‘tmoqchi bo‘lgan o‘zbekistonlik erkak ushlandi. Bu haqda India Times xabar berdi.

Ma’lum qilinishicha, O‘zbekiston fuqarosi Dubay reysini amalga oshirish uchun Chandigarh aeroportiga qochib ketgan payti ushlangan.

“U oltinlarni aravaga yashirib, Chandigarxga qochib ketgan. Biz uni o‘sha yerda qo‘lga olib, Dehliga olib keldik. O‘zbekistonlik erkak bagaj aravachasi ichiga umumiy og‘irligi 3208 gramm bo‘lgan 15 dona tilla zanjir va 17 dona yarim shar shaklidagi tilla buyumlarni yashirgan. Ammo qo‘lga tushishi mumkinligini anglab, 13-aprel kuni oltin solingan aravachani rentgen apparati yoniga qo‘yib, aeroportni tark etgan”, — deydi rasmiy.

Xuddi shu kuni oltin buyumlar aniqlangan. Tekshiruvdan so‘ng ayblanuvchining shaxsi aniqlangan va u Chandigarhdan Dubayga qochishni rejalashtirgani ma’lum bo‘lgan. Ma’lumot Chandigarhdagi rasmiylarga yetkazilgan va o‘zbekistonlik erkak u yerda qo‘lga olinib, Indira Gandi aeroportiga olib kelingan.

“Oltin Bojxona to‘g‘risidagi qonunning 110-moddasiga muvofiq olib qo‘yildi va yo‘lovchi 104-moddaga muvofiq hibsga olindi”, — deyiladi xabarda.

Musodara qilingan oltinning umumiy qiymati 1,7 million rupiyga (21 ming dollar) baholangan.