Toshkentda 29-fevral kuni King Long rusumli avtobus va Tracker ishtirokida YTH yuz berdi.
“Toshshahartransxizmat” matbuot xizmatining ma’lum qilishicha, 29-fevral kuni soat 06:45 larda 63-sonli yo‘nalishdagi King Long rusumli avtobus ASHB tomon harakatlanayotgan vaqtda Mirzo Ulug‘bek tumani, Yangi O‘zbekiston ko‘chasi chorrahasidan qayrilib olish vaqtida qarama-qarshi yo‘nalishdan Tracker kelib urilgan.
Yengil avtomobil yuqori — 197 kilometr/soat tezlikda harakatlanayotgan bo‘lgan. U avtobus o‘rta shina qismiga kelib urilgan.
Yo‘l-transport hodisasi vaqtida avtobus salonida yo‘lovchilar bo‘lmagan. Tracker haydovchisi tan jarohati olgan va tez tibbiy yordam ko‘rsatish uchun shifoxonaga olib ketilgan. Kompaniya matbuot xizmatining “Gazeta.uz”ga aniqlik kiritishicha, haydovchi vafot etgan.
Hozirda ushbu YTH Toshkent shahar IIBB YHXB xodimlari tomonidan rasmiylashtirilib, tergov-surishtiruv ishlari olib borilmoqda.
Poytaxtda so‘nggi vaqtlarda avtobuslar bilan sodir bo‘layotgan yo‘l-transport hodisalari ko‘paydi. 26-fevral kuni shunday YTHlar, texnik nosozliklar, tutash holatlari soni ortgani sabab 5 nafar masʼul xodim ishdan olingandi.
Izoh (0)