BBC o‘zbek xizmati jurnalisti Ibrat Safo Toshkent shahri Chilonzor tumani Ichki ishlar bo‘limiga “suhbatga” chaqirildi. Bu haqda uning o‘zi Facebook’dagi sahifasiga yozib qoldirdi.
Jurnalistning qayd etishicha, u 2017-yildan beri Chilonzorda “propiska”da turmaydi va uni topish uchun ikki marta 58 yoshli nafaqadagi o‘qituvchi opasi bezovta qilingan. Ibrat Safo opasiga “RUVD”ga bormaslikni aytib, Londondan telefon qilgan. Jurnalistni qidirgan Chilonzor tuman IIB xodimi “Jasur” to‘liq ism-sharifi va rutbasini aytishdan bosh tortgan.
“Jasur”ning aytishicha, Ibrat Safo O‘zbekiston haqida internetda “negativ” qoldirgani uchun “Prezident administratsiyasi qoshidagi ommaviy axborot vositalarini monitoring qiluvchi markaz” unga topshiriq bergan.
“Prezident administratsiyasi qoshidagi markazdan kelgan topshiriq mening 1-fevralda yozgan postimdan norozi ekan. U qisqa postimda hech kimning ismini keltirmaganman, shunchaki kimdir o‘z hokimligi davrida bir parkni quritib o‘rniga o‘zi soqqa qilish uchun disneylend qursa, demokratik davlatlarda bu yirik skandal bo‘lishini, lekin O‘zbekiston boshqa mezonlar bo‘yicha yashashini yozganman. Bo‘ldi. Shundan norozi bo‘lishibdi.
Jasurning necha yoshligi yo jurnalistika borasidagi bilimini bilmayman, lekin u meni ‘patriot’ bo‘lmaslikda aybladi va bunday postlarni yozishni to‘xtatishimni buyurdi. U o‘zining ‘patriot’ ekanini ham aytdi. Aynan qanday mavzularda yozishim mumkinligi haqida maslahat so‘raganimda, javob bermadi. Qachon O‘zbekistonga kelishimni bilishga uringanida, undan aviachipta so‘raganim ham negadir unga yoqmadi. Endi shikoyatni Tashqi ishlar vazirligiga jo‘natar ekan”, — deb yozadi Ibrat Safo.
1-fevral kuni Toshkent shahri sobiq hokimi, Akfa kompaniyalar guruhi asoschisi Jahongir Ortiqxo‘jayev o‘zining yettita kompaniyasini sotganini maʼlum qilgandi. Ular orasida 2021-yil iyun oyida Milliy bog‘ o‘rnida ochilgan Magic City parki ham bor edi. Loyihaning investori Akfa tarkibiga kiruvchi Stargate Systems bo‘lgan. Kompaniya 20,79 gektar park yerini 49 yillik ijaraga olgandi.
Izoh (0)