IIV qidiruvga berilgan ikki blogerning barcha jinoyatlarini oshkor qildi

O‘zbekiston Ichki ishlar vazirligi blogerlar Sanjar Ikromov va Sherali Komilovni qidiruvga bergani haqida xabar berilgan edi. Vazirlik “Daryo”ga ularning barcha jinoyatlarini ma’lum qildi.

Ma’lum qilinishicha, 1988-yilda tug‘ilgan Ikromov Sanjar 2011-yilning 1-mart kuni Toshkent shahri Olmazor tumanida fuqaro F.X.dan o‘zini avtomashinalar oldi-sotdisi bilan shug‘ullanishini aytib, Sergeli avtomashinalar bozoridan arzon garovga Nexia’ni olib berishni va’da qilgan. Jabrlanuvchidan 20 million so‘m pullarini aldov yo‘li bilan undirib, o‘z ehtiyojlariga ishlatib yuborganlikda ayblanadi.

Holat yuzasidan 2012-yil 31-mart kuni Olmazor tumani IIB tomonidan Jinoyat kodeksining 168-moddasi 3-qismi “a” bandi bilan jinoyat ishi qo‘zg‘atilgan bo‘lib, gumondor Sanjar Ikramov tergovdan yashiringani sababli, unga nisbatan qidiruv e’lon qilingan.

Shuningdek, 1979-yilda tug‘ilgan Komilov Sherali Nabixonovich, muqaddam 2011-yilda Jinoyat kodeksining 165-moddasi, 2022-yil 14-martda 168-modda 3-qismi “b” bandi bilan sudlangan bo‘lib, tuzalish yo‘liga o‘tmasdan o‘zining jinoiy harakatlarini davom ettirib,

• 2021-yilning 6-iyun kuni fuqaro Sh.S.ga (ayol) o‘zini mustaqil jurnalist va bloger, deb tanishtirib, ayolning o‘g‘li 1999-yilda tug‘ilgan Sh.A.ga nisbatan Koson tumani jinoyat ishlari sudining Jinoyat kodeksining 119-moddasi 3-qismi “b” bandi hamda 137-moddasi 2-qismi “a,v” bandlari bo‘yicha hukmini ijtimoiy tarmoqlar orqali e’lon qilib, sun’iy shov-shuv ko‘tarib, sudning keyingi instansiya qarorlariga ta’sir o‘tkazib, jazoni yengillashtirib berishni va’da qilgan, hamda jabrlanuvchidan 5 million so‘m miqdorda pul undirib, o‘z ehtiyojlariga sarflab yuborgan;
• 2021-yilning 17-dekabr kuni Qashqadaryo viloyati Qarshi shahrida fuqaro S.G. (ayol)ning, ishonchiga kirib, sobiq turmush o‘rtog‘i qarz bo‘lib qolgan ma’lum miqdordagi aliment pulini undirib berishni va’da qilib, jabrlanuvchidan aldov yo‘li bilan 5 million so‘m miqdorida pulini olib, o‘z ehtiyojlariga ishlatib yuborgan;
• 2021-yilning dekabr oyida fuqaro Q.X.ni uy-joy bilan bog‘liq muammoli masalasini hal etib berishni va’da qilib, jabrlanuvchidan turli vaqtlarda, 3 million, so‘ng 300 AQSH dollari miqdorida pullarini aldov yo‘li bilan undirib, o‘z ehtiyojlariga ishlatib yuborgan;
• 2022-yilning 19-dekabr kuni ijtimoiy tarmoqlar orqali Qarshi shahar 5-son tergov hibsxonasi xodimi M.A. va Qarshi shahar IIB vaqtincha saqlash hibsxonasi xodimi B.B.ni sha’ni va qadr qimmatini kamsituvchi so‘zlar bilan haqorat qilganlikda ayblanadi.  

Hozirda Sherali Komilov Jinoyat kodeksining 168-moddasi 3-qismi “b” bandi, 140-moddasi 3-qismi “a” bandi bilan qo‘zg‘atilgan jinoyat ishlari doirasida xavfli residivist, deb topilib, tergov organlaridan yashiringanligi sababli, qidiruv e’lon qilingan.

Mazkur shaxslarni yashiringan joyi haqida xabardor bo‘lgan fuqarolardan 102 raqamiga yoki ichki ishlar organlariga xabar berishlari so‘ralgan.