BBC ўзбек хизмати журналисти Ибрат Сафо Тошкент шаҳри Чилонзор тумани Ички ишлар бўлимига “суҳбатга” чақирилди. Бу ҳақда унинг ўзи Facebook’даги саҳифасига ёзиб қолдирди.
Журналистнинг қайд этишича, у 2017 йилдан бери Чилонзорда “прописка”да турмайди ва уни топиш учун икки марта 58 ёшли нафақадаги ўқитувчи опаси безовта қилинган. Ибрат Сафо опасига “РУВД”га бормасликни айтиб, Лондондан телефон қилган. Журналистни қидирган Чилонзор туман ИИБ ходими “Жасур” тўлиқ исм-шарифи ва рутбасини айтишдан бош тортган.
“Жасур”нинг айтишича, Ибрат Сафо Ўзбекистон ҳақида интернетда “негатив” қолдиргани учун “Президент администрацияси қошидаги оммавий ахборот воситаларини мониторинг қилувчи марказ” унга топшириқ берган.
“Президент администрацияси қошидаги марказдан келган топшириқ менинг 1 февралда ёзган постимдан норози экан. У қисқа постимда ҳеч кимнинг исмини келтирмаганман, шунчаки кимдир ўз ҳокимлиги даврида бир паркни қуритиб ўрнига ўзи соққа қилиш учун диснейленд қурса, демократик давлатларда бу йирик скандал бўлишини, лекин Ўзбекистон бошқа мезонлар бўйича яшашини ёзганман. Бўлди. Шундан норози бўлишибди.
Жасурнинг неча ёшлиги ё журналистика борасидаги билимини билмайман, лекин у мени ‘патриот’ бўлмасликда айблади ва бундай постларни ёзишни тўхтатишимни буюрди. У ўзининг ъпатриотъ эканини ҳам айтди. Айнан қандай мавзуларда ёзишим мумкинлиги ҳақида маслаҳат сўраганимда, жавоб бермади. Қачон Ўзбекистонга келишимни билишга уринганида, ундан авиачипта сўраганим ҳам негадир унга ёқмади. Энди шикоятни Ташқи ишлар вазирлигига жўнатар экан”, — деб ёзади Ибрат Сафо.
1 февраль куни Тошкент шаҳри собиқ ҳокими, Akfa компаниялар гуруҳи асосчиси Жаҳонгир Ортиқхўжаев ўзининг еттита компаниясини сотганини маълум қилганди. Улар орасида 2021 йил июнь ойида Миллий боғ ўрнида очилган Magic City парки ҳам бор эди. Лойиҳанинг инвестори Akfa таркибига кирувчи Stargate Systems бўлган. Компания 20,79 гектар парк ерини 49 йиллик ижарага олганди.
Изоҳ (0)