Xalq deputatlari Ohangaron shahar Kengashining navbatdan tashqari sessiyasida tashkiliy masalalar ko‘rib chiqildi. Unda Toshkent viloyati hokimi Zoir Mirzayev ishtirok etdi. Bu haqda Toshkent viloyati hokimligi matbuot xizmati xabar berdi.
Qayd etilishicha, sessiyada Zoir Mirzayev Ohangaron shahar hokimi lavozimiga Muzaffar Rajabboyev nomzodini tavsiya qilgan. Xalq deputatlari Ohangaron shahar Kengashining qarori bilan u Ohangaron shahar hokimi etib tayinlangan.
Muzaffar Rajabboyev 1984-yilda Parkent tumanida tug‘ilgan. Maʼlumoti – oliy. 2007-yil Toshkent irrigatsiya va melioratsiya instituti, 2014-yil O‘zbekiston prezidenti huzuridagi davlat boshqaruvi akademiyasi, 2019-yilda Xitoy xalqaro biznes va iqtisodiyot universitetida magistraturani tamomlagan.
U Qibray tumani IIB Yong‘in xavfsizligi xizmatida mehnat faoliyatini boshlagan. Shuningdek, Yuqori Chirchiq, Parkent tumani hokimliklarida masʼul vazifalarda ishlagan.
Tayinlovga qadar u Kambag‘allikni qisqartirish va bandlik vazirligida bo‘lim boshlig‘i lavozimida ishlab kelayotgan edi.
2020-yil iyundan buyon Ohangaron shahri hokimi lavozimida ishlab kelgan Akrom Eshonqulov fevral boshlarida lavozimdan ketganini ma’lum qilgandi. Oradan bir kun o‘tib, Ohangaron shahri hokimi vazifasini vaqtincha bajarish shahar hokimining moliya-iqtisodiyot va kambag‘allikni qisqartirish masalalari bo‘yicha birinchi o‘rinbosari Alisher Karimjanovga yuklangan edi.
Izoh (0)