O‘zbekistonning Yaponiyadagi elchixonasi delegatsiyasi amaliy tashrif bilan ushbu mamlakatning Xokkaydo prefekturasida bo‘ldi. Bu haqda “Dunyo” agentligi xabar berdi.
Tashrif davomida Xokkaydo prefekturasi gubernatori Naomichi Suzuki, Sapporo shahri meri Katsuxiro Akimoto, Xokkaydo universiteti vitse-rektori Aya Takaxashi, shuningdek, ARCS Group, Gorizontal Line Co.Ltd., ROYCE Confect Co., Ltd., OISCA tashkilotining Xokkaydo bo‘limi rahbariyati bilan ikki tomonlama uchrashuvlar o‘tkazilgan.
Xususan, Yaponiyaning qandolat mahsulotlari ishlab chiqaruvchi yirik ROYCE Confect Co., Ltd. kompaniyasining ishlab chiqarish zavodiga tashrif buyurilib, ushbu kompaniyaning xalqaro aloqalar departamenti direktori Maiko Yamazaki bilan o‘tkazilgan suhbat davomida kompaniya tomonidan ishlab chiqarilayotgan qandolatchilik mahsulotlarida O‘zbekistonda tayyorlangan quruq mevalardan (mayiz, yong‘oq) foydalanish masalasi muhokama qilinib, ushbu taklif yaponlarda katta qiziqish uyg‘otgan.
Shuningdek, tashrif davomida, shuningdek, Horizontal Line Co.Ltd kompaniyasi prezidenti Ryu Xiray bilan o‘zbek milliy mahsulotlarini yapon bozoriga eksport qilish masalalari muhokama qilingan.
Ryu Xiray hozirgi kunda kompaniya tomonidan Silk Raisin brendi ostida quritilgan mevalarni Yaponiyaga eksport qilish masalasi ishlab chiqilayotganini maʼlum qilgan.
Uchrashuv yakunlari bo‘yicha mamlakatimizdan Yaponiyaga quruq mevalar, to‘qimachilik mahsulotlari eksportini oshirish, o‘zaro hamkorlikda Xokkaydo prefekturasi savdo tarmoqlarida mahalliy mahsulotlarni keng targ‘ib qilish bo‘yicha kelishuvga erishilgan.
Eslatib o‘tamiz, O‘zbekiston 2022-yilning yanvar—dekabr oylari davomida xorijiy mamlakatlarga umumiy qiymati 1 milliard 134,3 million dollarga teng bo‘lgan 1,7 million tonna meva-sabzavot mahsulotlarini eksport qilgan.
Izoh (0)