Sherali Jo‘rayev Surxondaryo viloyati hokimining o‘rinbosari — viloyat investitsiyalar, sanoat va savdo boshqarmasi boshlig‘i lavozimiga tayinlandi. Bu haqda viloyat hokimligi matbuot xizmati xabar berdi.
Sherali Jo‘rayev 1984-yil Oltinsoy tumanida tug‘ilgan. 2007-yilda Termiz davlat universitetini, 2010-yilda O‘zbekiston prezidenti huzuridagi davlat boshqaruvi akademiyasini tamomlagan. Maʼlumoti bo‘yicha mutaxassisligi – amaliy matematika, moliya, davlat boshqaruvi.
U mehnat faoliyati davomida tuman hokimining o‘rinbosari, viloyat Investitsiyalar va tashqi savdo boshqarmasi boshlig‘ining o‘rinbosari, Mahallabay ishlash va tadbirkorlikni rivojlantirish agentligining viloyat hududiy boshqarmasi boshlig‘i lavozimlarida mehnat qilgan.
Mazkur lavozimga tayinlangunga qadar 2023-yildan buyon Surxondaryo viloyati Kambag‘allikni qisqartirish va bandlik bosh boshqarmasi boshlig‘i o‘rinbosari lavozimida faoliyat yuritayotgan edi.
Shuningdek, Elbek G‘afforov Navoiy viloyati hokimi o‘rinbosari — viloyat investitsiyalar, sanoat va savdo boshqarmasi boshlig‘i lavozimiga tayinlandi.
Tayinlovga qadar u Navoiy viloyat Investitsiyalar, sanoat va savdo boshqarmasi boshlig‘ining birinchi o‘rinbosari vazifasida faoliyat yuritgan.
Elbek G‘afforov 1989-yilda Navoiy viloyati, Xatirchi tumanida tug‘ilgan. 2011-yilda Toshkent davlat sharqshunoslik institutining “Xalqaro munosabatlar” yo‘nalishini tamomlagan.
Avvalroq Namangan viloyatining Chust, Farg‘ona viloyatining Bag‘dod va Uchko‘prik hamda Jizzax viloyatining Baxmal tumanlariga hokimlar tayinlangani to‘g‘risida xabar berilgandi.
Izoh (0)