Xitoylik erkak xotirasi bilan bog‘liq muammo tufayli shifokorlarga murojaat qildi. Ko‘rik davomida uning miya arteriyasida igna borligi aniqlandi. Bu haqda Daily Mail xabar berdi.
Sichuan provinsiyasida yashovchi 74 yoshli erkak xotirasidagi muammolar tufayli shifokorga borgan. Uning miyasidagi arteriyaga juda kichik igna tiqilib qolgani va bu xotira pasayishiga sabab bo‘layotgani aniqlangan. Erkak 20 yil avval migren tufayli igna muolajalarini olgani ma’lum bo‘lgan.
Shifokorlar fikricha, o‘sha paytda igna ko‘z orqasidagi arteriyaga kirgan bo‘lishi mumkin. Ignani olib tashlash uchun bemor bosh suyagining bir qismi kesilgan. Uni olib tashlashda jarrohlik mikroskopi kerak bo‘lgan. Igna bilan shikastlangan tomir kichik metall qisqich yordamida yopilgan.
Operatsiyadan o‘n kun o‘tgach, erkak sun’iy nafas olish apparatidan uzilgan va tuzala boshlagan. Biroq umumiy anesteziya paytida bemorda o‘limga olib keladigan o‘pka infeksiyasi rivojlangan. Natijada erkak operatsiyadan keyin faqat uch hafta yashagan.
Shifokorlar erkakka ichki psevdoanevrizma tashxisini qo‘ygan, bunda qon miyadagi tomirdan oqib chiqadi, lekin uning atrofidagi to‘qimalar tomonidan ushlab qolinadi. Olimlar fikricha, bu tibbiy adabiyotlarda tasvirlangan akupunktur ignasi (tibbiy muolajada ishlatiladigan igna) sabab bo‘lgan psevdoanevrizmaning birinchi holatidir.
Izoh (0)