Surxondaryo viloyati bojxona boshqarmasi “Sariosiyo” temiryo‘l chegara bojxona postida qiymati 10 milliard so‘mdan ortiq noqonuniy sigaretlar to‘xtatib qolindi.
Qayd etilishicha, bojxona postiga qo‘shni davlatdan Tojikistonga o‘tish uchun O‘zbekistonga kirib kelgan temiryo‘l poyezdi tarkibidagi vagonlardan biri bojxona postida mavjud bo‘lgan temiryo‘l vagonlarini skaner qilishga mo‘ljallangan inspeksion ko‘rik majmuasidan o‘tkazilgan. Rentgen tasvirlarida vagon ichida yuk kuzatuv hujjatlarida ko‘rsatilmagan tovarlar borligi maʼlum bo‘lgan.
Natijada, ushbu vagon bojxona ko‘rigidan o‘tkazilganda “Changyutgich”, “Kir yuvish mashinasi” va “Quruq sut” kabi tovarlar orasida hujjatlarida ko‘rsatilmagan, aksiz markalari mavjud bo‘lmagan va bojxona nazoratidan yashirilgan umumiy qiymati 10 milliard 50 million so‘mlik 402 ming quti Esse Change nomli tamaki mahsulotlari borligi aniqlangan.
Hozirda mazkur holat yuzasidan bojxona organlari tomonidan tekshiruv harakatlari olib borilmoqda.
Avvalroq Toshkent shahridagi zavodlardan birida bojxona xodimlari tomonidan noqonuniy muomaladan olib qo‘yilgan 110 ming quti tamaki mahsulotlarini yo‘q qilish tadbiri bo‘lib o‘tgandi.
Izoh (0)