O‘zbekistonda endi jismoniy yoki yuridik shaxslar, hududiy yo‘l harakati xavfsizligi boshqarmalariga xat bilan murojaat etgan holda, o‘zlari istagan joyda svetofor o‘rnatishlari mumkinligi haqida xabarlar tarqaldi. Yo‘l harakati xavfsizligi xizmati mazkur xabar haqiqatga to‘g‘ri kelmasligini ma’lum qildi.
“Yo‘l harakatini tartibga solish vositalarini o‘rnatish vazifasi mas’ul idora va tashkilotlar zimmasiga aniq yuklatilgan bo‘lib, istalgan jismoniy yoki yuridik shaxslar bunday vositalarni o‘zboshimchalik bilan yoki qandaydir ruxsat asosida o‘rnatish vakolatiga ega emasligini ma’lum qilamiz”, — deyiladi rasmiy munosabatda.
2013-yil 10-apreldagi “Yo‘l harakati xavfsizligi to‘g‘risida”gi qonunga o‘zgartish va qo‘shimchalar kiritish haqidagi qonunning 7-moddasiga ko‘ra, Mahalliy davlat hokimiyati organlarining yo‘l harakati xavfsizligini ta’minlash sohasidagi vakolatlariga shaharlardagi, shaharchalar va qishloq aholi punktlaridagi ko‘chalarning, yo‘lkalarning hamda yo‘l harakatini tartibga solish vositalarining, shuningdek, shahar elektr transporti yo‘llarining jihozlanishi va soz holatda saqlanishini ta’minlash vakolati kirishi ko‘rsatilgan.
Mazkur qonunning 10-moddasiga ko‘ra, IIV Davlat yo‘l harakati xavfsizligi xizmatining yo‘l harakati xavfsizligini ta’minlash sohasidagi vakolatlariga yo‘llarning va temiryo‘llarni kesib o‘tish joylarining saqlanishi, ularning yo‘l harakatini tartibga solish vositalari bilan jihozlanishi ustidan nazoratni amalga oshirish vakolati kirishi ko‘rsatilgan.
Izoh (0)