Toshkent viloyatida haydovchilik guvohnomasi tayyorlab berishini aytib, fuqarolarni chuv tushirib kelgan shaxs qo‘lga olindi. Bu haqda IIV Kiberxavfsizlik markazi xabar berdi.
Qayd etilishicha, Jizzax shahrida yashovchi B.Sh. IIOga murojaat qilib, bank kartasidan jami 3 million so‘m miqdoridagi pul mablag‘lari nomaʼlum shaxs tomonidan firibgarlik yo‘li bilan o‘zlashtirilganini maʼlum qilgan. Tezkor-qidiruv xizmati Kiberxavfsizlik bo‘linmalari xodimlari tomonidan o‘tkazilgan tezkor-qidiruv tadbirlari natijasida, mazkur jinoyatni Toshkent viloyati Angren shahrida yashovchi 24 yoshli K.F. sodir etgani aniqlangan.
Unga ko‘ra, K.F. jabrlanuvchi B.Sh.ga o‘zini Telegram’dagi “O‘zbekiston” nomli guruh admini sifatida tanishtirib, unga haydovchilik guvohnomasi tayyorlab berishini aytgan. Buning uchun “B” toifaga 3 million so‘m, “B, C” toifaga 3,5 million so‘m miqdorida pul tashlab berishi lozimligini aytib, 3 million so‘m miqdoridagi pulni oldindan o‘zining foydalanuvida bo‘lgan bank kartasiga o‘tkazib olgan. Shundan so‘ng u yozishmalarni o‘chirib yuborib, fuqaroning qo‘ng‘iroqlariga javob bermay, “qora ro‘yxat”ga kirgizib qo‘ygan.
Mazkur holat yuzasidan Jinoyat kodeksining 168-moddasi (firibgarlik) 3-qismi “g” bandi bilan jinoyat ishi qo‘zg‘atilib, K.F.ning sodir qilib, fosh etilmay qolgan boshqa shu turdagi jinoyatlarga aloqadorligini tekshirish yuzasidan tezkor-surishtiruv ishlari olib borilmoqda.
Bundan oldin Toshkent viloyatida soxta sertifikat evaziga haydovchilik guvohnomasi olgan fuqaroga sud hukmi o‘qilgandi. Unga Jinoyat kodeksining 59-moddasiga asosan tayinlangan jazolarni qisman qo‘shish yo‘li bilan uzil-kesil o‘tash uchun ish haqining 20 foizini davlat daromadi hisobiga ushlab qolgan holda 2,5 yil muddatga axloq tuzatish ishlari jazosi tayinlangan. May o‘rtalarida bo‘lsa, Farg‘onada 200 dollarga “prava” olib berishni va’da qilgan avtomaktab rahbari ushlangandi.
Izoh (0)