Toshkent shahrida tutqanog‘i tutib katta ko‘cha yoqasida yiqilib yotgan fuqaroga YPX xodimi yordam berdi. Bu haqda “Sevimli” telekanali orqali efirga uzatilgan lavhada ma’lum qilindi.
Qayd etilishicha, ushbu hodisa 13-fevral kuni sodir bo‘lgan va holat atrofdagi kuzatuv kameralariga tushib qolgan. Yakkasaroy tumani Kichik halqa yo‘li ko‘chasi bo‘ylab ketayotganda fuqaro birdan yerga yiqilgan. O‘sha atrofda bo‘lgan fuqaro unga e’tibor bermay, telefonda gaplashish bilan ovora bo‘lgan, haydovchilar tomonidan ham yordam ko‘rsatilmagan.
Shu payt YPX xizmat mashinasi yotgan odamni ko‘rib to‘xtagan va xodimlardan biri unga yordam bergan.
Keyinchalik ma’lum bo‘lishicha, xodim kichik serjant Javohirbek Tovasharov bo‘lgan. Bemorga dastlabki yordamni ko‘rsatgach, uni shifoxonaga olib bormoqchi bo‘lgan. Biroq o‘ziga kelgan bemor dorisi tugab qolgani uchun tutqanog‘i tutib qolganini aytgach, unga kerakli dorilarni olib berib, manziliga yetkazib qo‘ygan.
Fevral boshlarida Farg‘onada YPX xodimi meva o‘g‘irlagan maktab o‘quvchisiga tushuntirish bergach, o‘z hisobidan unga mevalarni olib bergandi.
Izoh (0)