Prezident Shavkat Mirziyoyev raisligida Andijon viloyatida bo‘lib o‘tgan yig‘ilishda davlat rahbari Andijondagi sanʼat maktabiga Sherali Jo‘rayev nomini berishni taklif qilib, marhum sanʼatkor haqida gapirdi.
Davlat rahbari o‘zbek qo‘shiqchilik sanʼati rivojida o‘chmas iz qoldirgan O‘zbekiston va Tojikiston xalq artisti, Alisher Navoiy mukofoti sovrindori, mashhur hofiz Sherali Jo‘rayev yoshlarga katta maktab qoldirib ketganini qayd etgan.
“Sherali Jo‘rayev yoshlarga katta maktab qoldirib ketgan, desak to‘g‘ri bo‘ladi. Agar umr paytida adolatsizlik bo‘lmaganda edi, bugun yonimizda bo‘lar edi”, — deydi prezident.
Davlat rahbari Andijon shahridagi sanʼat maktabiga Sherali Jo‘rayev nomini berish taklifini ilgari surdi. Bu maktab Musiqa va sanʼat kollejiga aylantirilib, grant asosida zamonaviy kadrlar tayyorlash yo‘lga qo‘yiladi. Yangi o‘quv va turar joy binosi, zarur infratuzilma obyektlari barpo etiladi, shuningdek, Sherali Jo‘rayev byusti o‘rnatiladi.
Shuningdek, Shohjahon Jo‘rayev otasining 25 yilga yaqin taqiqda bo‘lgani va prezidentni hamisha ota deb atagani haqida gapirdi.
“Otamizning ijodini ikki pallaga bo‘ladigan bo‘lsam: 90-yilgacha bo‘lgan davrlarda 25 yilga yaqin taqiqda edilar. Otamiz ijodining ikkinchi davri 2016-yildan boshlandi, sizning sharofatingiz va eʼtiboringiz bilan. Biz har yili Mustaqillik bayramini tomosha qilib, otamiz chiqarmikan, “O‘zbegim”ni aytarmikan, deb duo qilardik. Shu kunni siz otamizga yana qaytib berdingiz. Va birinchi kelib gapirgan gapi shu bo‘ldiki — sizni ota deb gapirar edilar — ota mening 40 yoshimni qaytarib berdilar, dedilar. Biz ham uyda sizni ota deymiz”, — deydi Shohjahon Jo‘rayev.
O‘zbekiston xalq artisti Sherali Jo‘rayev 4-sentyabr kuni 77 yoshida hayotdan ko‘z yumdi. Sherali Jo‘rayev 50 yildan ziyod ijodi davomida “O‘zbegim”, “Sohibqiron”, “Egasi bor yurt”, “Karvon”, “Sarbon”, “Inson qasidasi” kabi 600 ga yaqin qo‘shiq yaratgan. Uning “Birinchi muhabbatim”, “Yoshligimiz”, “Oy yuzingga”, “Oshiqlar sardori”, “Do‘st bo‘lsang, yonimda tur” kabi ashulalari xalq qo‘shiqlariga aylanib ketgan.
Xonanda mumtoz shoirlar g‘azallarini kuyga solib, o‘zbek xalqi merosini yosh avlodga va jahonga tanitishga ulkan hissa qo‘shgan. Sherali Jo‘rayev 1981-yilda “O‘zbekistonda xizmat ko‘rsatgan artist”, 1987-yilda “O‘zbekiston xalq artisti” faxriy unvonlari, 2018-yilda “Fidokorona xizmatlari uchun” ordeniga sazovor bo‘lgan.
Shavkat Mirziyoyev 2022-yilda Sherali Jo‘rayevga tug‘ilgan kuni munosabati bilan tabrik yo‘llagan. “El-yurtimiz sizni butun hayotini o‘zbek madaniyati va san’atini rivojlantirishga bag‘ishlagan, o‘z ijodiy maktabini yaratgan ulkan va betakror iste’dod egasi, fidoyi va millatparvar shaxs sifatida yaxshi biladi va yuksak qadrlaydi”, deyiladi tabrikda.
Izoh (0)