O‘zbekiston xalq artisti Sherali Jo‘rayev 4-sentabr kuni vafot etgani xabar qilingandi. Prezident Shavkat Mirziyoyev marhumning vafoti yuzasidan ta’ziya bildirdi.
O‘zbekiston madaniyati va sanʼati og‘ir judolikka uchradi.
Milliy qo‘shiqchilik sanʼatimizning atoqli namoyandasi, ustoz sanʼatkor, O‘zbekiston xalq artisti Sherali Jo‘rayev shu yil 4-sentabr kuni 77 yoshida vafot etdi.
Sherali Jo‘rayev 1947-yil 12-aprelda Andijon viloyatining Asaka shahrida tug‘ildi.1971-yilda Toshkent teatr va rassomchilik sanʼati instituti (hozirgi O‘zbekiston davlat sanʼat va madaniyat instituti)ni tamomlab, mehnat faoliyatini “Shodlik” ashula va raqs ansamblining xonandasi sifatida boshladi. Ko‘p yillar Andijon viloyati filarmoniyasi, O‘zbekiston davlat filarmoniyasi, “O‘zbekkonsert” davlat muassasasi kabi ijodiy tashkilotlarda faoliyat ko‘rsatib, xalqimizga sidqidildan xizmat qildi.
Sherali Jo‘rayev o‘zining noyob isteʼdodi, betakror ovozi va yuksak ijro mahorati bilan yuzlab yorqin qo‘shiqlar yaratib, xalqimiz o‘rtasida munosib obro‘-eʼtibor topdi. Mumtoz va zamonaviy adabiyotimizning ko‘plab sheʼriy namunalarini kuyga solib, o‘zbek qo‘shiqchilik sanʼatining “oltin fondi”ni boyitishga beqiyos hissa qo‘shdi.
Sherali Jo‘rayev ko‘p yillik samarali ijodi bilan zamonaviy milliy sanʼatimiz va madaniyatimizni rivojlantirish, uning shuhratini chet ellarda keng targ‘ib etish borasida ham fidoyilik ko‘rsatdi. U jamoat ishlarida ham faol ishtirok etdi. Ayniqsa, milliy parlamentimiz deputati sifatida mustaqilligimizning maʼnaviy asoslarini mustahkamlash, xalqimiz, avvalo, yosh avlodimizni Vatanga muhabbat va sadoqat, milliy va umuminsoniy qadriyatlar ruhida tarbiyalash borasida jonbozlik bilan faoliyat olib bordi.
Keyingi yillarda “Vatandoshlar” jamoat fondining Vasiylik kengashi raisi vazifasida samarali mehnat qilib, xorijiy davlatlarda istiqomat qilayotgan vatandoshlarimiz bilan aloqalarni mustahkamlashda munosib xizmat qildi.
Mohir sanʼatkor o‘zbek milliy qo‘shiqchiligida o‘z ijodiy maktabini yaratib, ko‘plab yosh isteʼdod egalarini tarbiyaladi.
Sherali Jo‘rayevning milliy sanʼatimiz va madaniyatimizni rivojlantirish borasidagi xizmatlari davlatimiz tomonidan munosib taqdirlandi. U “O‘zbekistonda xizmat ko‘rsatgan artist”, “O‘zbekiston xalq artisti” faxriy unvonlari, Alisher Navoiy nomidagi O‘zbekiston Respublikasi davlat mukofoti, “Fidokorona xizmatlari uchun” va “El-yurt hurmati” ordenlari bilan mukofotlangan edi.
Betakror sanʼatkor, samimiy va kamtarin inson, yoshlarning mehribon va talabchan ustozi Sherali Jo‘rayevning yorqin xotirasi qalblarimizda hamisha saqlanib qoladi.
Shavkat Mirziyoyev, Tanzila Norboyeva, Nurdinjon Ismoilov, Abdulla Aripov, Xayriddin Sultonov, Ozodbek Nazarbekov
Izoh (0)